بەریتانیا جەخت لە بەردەوامیى پشتگیریى هەرێمى کوردستان دەکاتەوە
K24- هه‌ولێر:
نێچیرڤان بارزانى، سه‌رۆكی هه‌رێمی كوردستان له كۆبوونه‌وه‌یه‌كدا لەگەڵ جه‌میس کلیڤه‌رلی، وه‌زیری به‌ریتانیا بۆ کاروباری رۆژهه‌ڵاتی ناوه‌ڕاست و باکووری ئافریقیا و جه‌میس هیپی، وه‌زیری ده‌وڵه‌ت بۆ کاروباری هێزه چه‌کداره‌کان، سوپاس و پێزانینى هەرێمى کوردستانى بۆ پشتگیری و هاوکارییەکانى بەریتانیا لە شەڕى دژى تیرۆردا دووپات کردەوە و رایگەیاند، پێویستە ئیرادەیەکى سیاسى لە عێراق بۆ چارەسەرکردنى کێشەکانى هەولێر ـ بەغدا هەبێت و سیستەمى فیدراڵى وەك لە دەستووردا هاتووە، بە بنەما بكرێت.
لە کۆبوونەوەکەدا کە ئەمڕۆ سێشەممە 1/12/2020 بە ئامادەبوونى جێگرانى سەرۆکى هەرێمى کوردستان لە هەولێر بەڕێوە چوو، هەردوولا پەیوەندییەکانى هەرێمى کوردستان و عێراقیان لەگەڵ بەریتانیا، دوایین پێشهاتەکانى دۆخى سیاسى و ئەمنیى عێراق، کێشەکانى هەولێر ـ بەغدا و بەردەوامیى مەترسی و هەڕەشەکانى داعشیان تاوتوێ کرد و هاوڕا بوون، کە بۆ شەڕى دژى تیرۆر هێشتا هاوکارى و پشتگیریى هاوپەیمانیى نێودەوڵەتى بۆ عێراق و هەرێمى کوردستان پێویستە.
سەرۆکى هەرێمى کوردستان، سەردانى هه‌ردوو وەزیرانى بەریتانیاى بۆ هەرێمى کوردستان لەم دۆخەکەدا کە بەهۆى بڵاوبوونەى ڤایرۆسى کۆرۆناوە جیهان بە کاتێکى سەختدا تێدەپەڕێت، بە مایەى پێزانین و پەیامێکى ئەرێنى لە قەڵەم دا و خواستى هەرێمى کوردستانى بۆ برەودان بە پەیوەندییەکانى لەگەڵ بەریتانیان لە هەموو بوارەکاندا دووپات کردەوە.
هەردوو وەزیرانى بەریتانیا سوپاس و پێزانینى وڵاتەکەیان بۆ ڕۆڵى هەرێمى کوردستان و قارەمانیەتیى پێشمەرگە لە شەڕى دژى تیرۆر و تێکشکاندنى داعشدا دووپات کردەوە و رایانگەیاند، بەریتانیا لە هاوکارى و پشتگیریى هەرێمى کوردستان بۆ رووبەڕووبوونەوە و لەناوبردنى یەکجارەکیى تیرۆر و مەترسییەکانى داعش و یارمەتیدانى هەولێر و بەغدا بۆ چارەسەرکردنى کێشەکانیان بەردەوام دەبێت.
هەڵبژاردنەکانى داهاتووى عێراق، پەرەسەندنەکانى ناوچەکە بەگشتى، دۆخى ئاوارە و پەنابەران لە هەرێمى کوردستان، پەیوەندییەکانى هەرێمى کوردستان و عێراق لەگەڵ وڵاتانى دراوسێ و چەند پرسێکى جێى بایەخى هەردوولا، تەوەرێکى دیکەى کۆبوونەکە بوون.
H.B
