ئێران: خوێنی فه‌خریزاده‌ كۆتوبه‌نده‌كانی سه‌ر رێگه‌ی پرۆگرامی ناووكی شكاند

وڵاته‌كه‌مانی خسته‌ سه‌ر رێگه‌ی په‌ره‌پێدان
سه‌رۆكی ئه‌نجوومه‌نی شورای كۆماری ئیسلامی ئێران، "محه‌مه‌د باقر قالیباف"
سه‌رۆكی ئه‌نجوومه‌نی شورای كۆماری ئیسلامی ئێران، "محه‌مه‌د باقر قالیباف"

K24 – هه‌ولێر:

سه‌رۆكی ئه‌نجوومه‌نی شورای كۆماری ئیسلامی ئێران، "محه‌مه‌د باقر قالیباف" رایگه‌یاند، خوێنی زانای ناووكی ئێران، "موحسین فه‌خریزاده‌" كۆت و به‌ندی سه‌ر رێگه‌ی بره‌ودان به‌ وزه‌ی ناووكی ئێرانی شكاند.

"قالیباف" سه‌ردانی خێزانی "فه‌خریزاده‌"ی كرد و گوتی: "گیانی به‌ره‌نگاری و زانستیی ئه‌و زانایانه‌مان، له‌ بواری به‌رگری و ناووكیدا، وڵاته‌كه‌مانی خسته‌ سه‌ر رێگه‌ی په‌ره‌پێدان. فه‌خریزاده‌ نموونه‌یه‌كی به‌رچاوی ئه‌و زانایانه‌ بوو".

هه‌روه‌ها گوتی: "فه‌خریزاده‌ كاری بۆ پێشكه‌وتنی پیشه‌سازی و سه‌ربه‌رزی وڵاته‌كه‌ی ده‌كرد و خزمه‌ته‌كانی له‌ مێژووی زانستیی و توێژینه‌وه‌ی ئێراندا به‌ نه‌مری ده‌مێننه‌وه‌".

جه‌ختیكرده‌وه‌، "خوێنی فه‌خریزاده‌، بووه‌ته‌ هۆی ئه‌وه‌ی ئێران كۆت و به‌نده‌كانی سه‌ر رێگه‌ی كه‌رتی وزه‌ی ناووكی وڵاته‌كه‌ی و پێشكه‌وتنی زیاتر له‌و بواره‌دا بشكێنێت".

هه‌ینی پێشووتر، زانای ناووكی كۆماری ئیسلامی ئێران، كه‌ پێشتر، "بنیامین ناتانیاهۆ"ی سه‌رۆك وه‌زیرانی ئیسرائیل، له‌ میانی ئاشكراكردنی دۆسییه‌كانی په‌یوه‌ست به‌ پرۆگرامی ناووكی ئێران ناوی هێنابوو و گوتبووی "ئه‌و ناوه‌تان له‌ بیر بێت"، له‌ لایه‌ن ژماره‌یه‌ك چه‌كداره‌وه‌ له‌ نزیك تارانی پایته‌ختی كۆماری ئیسلامی درایه‌ به‌ر ده‌ستڕێژی گوله‌ و به‌و هۆیه‌وه‌ گیانی له‌ده‌ستدا.