حه‌لبووسی داوایكرد كۆمیسیۆن له‌ سه‌لامه‌تی ئامێره‌كانی ده‌نگدانی ئه‌لیكترۆنی دڵنیا ببێته‌وه‌

گرێبه‌ست له‌گه‌ڵ كۆمپانیایه‌كی بیانیدا بكات
ئامێری ده‌نگدانی ئه‌لیكترۆنی، كه‌ له‌ هه‌ڵبژاردنه‌كانی عێراقدا به‌كارده‌هێنرێت
ئامێری ده‌نگدانی ئه‌لیكترۆنی، كه‌ له‌ هه‌ڵبژاردنه‌كانی عێراقدا به‌كارده‌هێنرێت

K24 – هه‌ولێر:

سه‌رۆكی ئه‌نجوومه‌نی نوێنه‌رانی عێراق، "محه‌ممه‌د حه‌لبووسی" داوای له‌ كۆمیسیۆنی باڵای سه‌ربه‌خۆی هه‌ڵبژاردنه‌كانی عێراق كرد، گرێبه‌ست له‌گه‌ڵ كۆمپانیایه‌كی بیانیدا بكات، بۆ ئه‌وه‌ی ئامێری ده‌نگدانی ئه‌لیكترۆنی عێراق بپشكنێت و له‌ سه‌لامه‌تی پرۆسه‌ی ده‌نگدانی ئه‌لیكترۆنی دڵنیا بێته‌وه‌.

نووسینگه‌ی راگه‌یاندنی "حه‌لبووسی" له‌ راگه‌یه‌ندراوێكدا، بڵاویكردووه‌ته‌وه‌، له‌ میانی كۆبوونه‌وه‌ی سه‌رۆكی ئه‌نجوومه‌نی نوێنه‌ران له‌گه‌ڵ سه‌رۆكی كۆمیسیۆنی باڵای سه‌ربه‌خۆی هه‌ڵبژاردنه‌كان و ژماره‌یه‌ك له‌ ئه‌ندامانی، "حه‌لبووسی" به‌ پێویست و گرنگی زانیوه‌ رێژه‌ی تۆماری بایۆمه‌تری زیاتر بكرێت و رێكاری پێویست بگیرێته‌ به‌ر بۆ خێراكردنی پرۆسه‌ی تۆماری بایۆمه‌تری، تا بتوانرێت زۆرترین كه‌س ئه‌و تۆماره‌ی هه‌بێت.

هه‌روه‌ها "حه‌لبووسی" هانی كۆمیسیۆنی داوه‌، رێكاری پێویست بگرێته‌ به‌ر بۆ ئه‌وه‌ی له‌ مانگی حوزه‌یران/ یۆنیۆی داهاتوودا پرۆسه‌ی هه‌ڵبژاردنی گشتیی عێراق به‌ پاك و بێگه‌ردی به‌ڕێوه‌به‌رێت و ده‌رفه‌ت بۆ گزی و ساخته‌كاری له‌ پرۆسه‌كه‌دا نه‌مێنێت. له‌و چوارچێوه‌یه‌شدا به‌ پێویستیی زانی، كۆمیسیۆن له‌گه‌ڵ كۆمپانیایه‌كی جیهانی گرێبه‌ست بكات بۆ ئه‌وه‌ی ئامێره‌كانی ده‌نگدانی ئه‌لیكترۆنی بپشكنێت و له‌ سه‌لامه‌تی پرۆسه‌كه‌ دڵنیا ببێته‌وه‌.