سەرۆك بارزانی پێشوازی لە نێردەی تایبەتی سەرۆكی فەڵەستین كرد

K24- هه‌ولێر:

رۆژی شەممە، 12ـی كانوونی یەكەمی 2020 لە سەلاحەدین سەرۆك مەسعود بارزانی پێشوازی لە لیوا جوبراییل ئەلرەجوب، نێردەی تایبەتی سەرۆكی فەڵەستین و ئەمینداری گشتیی رێكخراوی فەتح كرد.

لە دیدارێكدا كە نەزمی حزووری، كونسوڵی فەڵەستین لە هەولێر ئامادەی بوو، نێردەی تایبەتی سەرۆكی فەڵەستین سڵاوی تایبەتی مەحموود عەباس، سەرۆكی فەڵەستینی بە سەرۆك بارزانی گەیاند و وێڕای ئاماژەدان بە پەیوەندییە مێژووییەكانی نێوان گەلی فەڵەستین و گەلی كوردستان، سەرسامیی خۆشی بە بووژانەوەی هەرێمی كوردستان لە 10 ساڵی رابردوودا نیشان دا و رایگەیاند، سەرباری بوونی كێشەی گەورە و شەڕی داعش و تەحەددیاتی تر، بەڵام هەرێمی كوردستان هەنگاوی باشی بە ئاراستەی پێشكەوتن ناوە.

لە بەرامبەردا سەرۆك بارزانی سوپاسی مەحموود عەباس، سەرۆكی فەڵەستینی كرد و پێزانینی هەبوو بۆ پشتیوانی و هاوسۆزیی گەلی فەڵەستین و ئازادیخوازەكانی فەڵەستین، كە لە رۆژانی تەنگانەدا پاڵپشتی خەباتی گەلی كوردستان بوونە.

هەر لەو كۆبوونەوەیەدا بارودۆخی سیاسیی و دواپێشهاتەكانی ناوچەكە تاوتوێ كرا و جەخت لە پەرەپێدانی پەیوەندیەكانی نێوان هەردوولا كرایەوە.

H.B