مەسرور بارزانی: ھێرشکردنە سەر گەشتیاران بە توندترین شێوە سەرکۆنە دەکەم
K24- هه‌ولێر:
له راگه‌یه‌ندراوێكدا، مه‌سرور بارزانی، سه‌رۆكی حكومه‌تی هه‌رێمی كوردستان هێرش و په‌لاماره‌كانی چه‌ند رۆژی رابردووی سه‌ر گه‌شتیارانی به‌غدا و پارێزگاكانی دیكه‌ی عێراق شه‌رمه‌زار كرد و دووپاتیكرده‌وه، ئه‌و ره‌فتارانه له هه‌موو دابونەریتێکی کۆمەڵگەی کوردستان دووره.
ده‌قی راگه‌یه‌ندراوه‌كه‌ی مه‌سرور بارزانی، سه‌رۆكی حكومه‌تی هه‌رێمی كوردستان:
بە داخێکی زۆرەوە لەم رۆژانەی دواییدا، چەند رووداوێکی نەخوازرا و دوور لە هەموو دابونەریتێکی کۆمەڵگەی کوردستان روویاندا و چەند کەسێکی تێکدەر و ئاژاوەگێڕ، هێرشیان کردە سەر گەشتیارانی بەغدا و پارێزگاکانی دیکەی عێراق، کە بۆ بەسەربردنی پشووی سەری ساڵ هاتوونەتە هەرێمی کوردستان. ئەم دەستدرێژیانە بە تووندترین شێوە سەرکۆنە و شەرمەزار دەکەم، کە دوورن لە بەها و رەوشتە بەرزەکانی کۆمەڵگەکەمان.
هەرێمی کوردستان لە ساڵانی رابردوودا و تا ئێستاش، پەناگەیەکی ئارام بووە بۆ ملیۆنان ئاوارە و پەنابەری پارێزگاکانی عێراق و وڵاتانی دەوروبەر و هەمیشە بێ جیاوازی، دەرگای کراوە بووە بۆ میوانداری و لەباوەشگرتنیان، هەروەها بەردەوامیش سەدان هەزار گەشتییار، روویان لە هەرێمی کوردستان کردووە و بەڕێز و خۆشەویستییەوە پێشوازیان لێکراوە. بۆیە رووداوەکانی ئەم دواییە، نامۆن بە رەوشت و کولتووری لێبوردەیی و بەیەکەوەژیانی ئاشتییانە و مرۆڤدۆستانەی خەڵکی کوردستان. هەرکەس و لایەنێکیش هەوڵی شێواندن و ناشرینکردنی ئەم کولتوورە بەرزەی کۆمەڵگەکەمان بدات، رێکاری تووندی یاسایی بەرامبەر دەگیرێتەبەر.
مەسرور بارزانی
سەرۆکی حکومەتی هەرێمی کوردستان
2021/1/2
H.B