تۆمارکردنی ناوی قەوارە و لایەنەکان بۆ بەشداریکردن لە هەڵبژاردنی عێراق دەستیپێکرد

K24 - ھەولێر

ئەمڕۆ كۆمسیۆنی باڵای ھەڵبژاردنەكانی عێراق دەرگای خۆتۆماركردن بۆ قەوارە و لایەنەكان دەكاتەوە و پرۆسەكە ماوەی ھەفتەیەك بەردەوام دەبێت.

عەبدولرەزاق موشیر، بەرپرسی نووسینگەی كۆمسیۆنی ھەڵبژاردنەكانی عێراق لە ھەولێر بە كوردستان24ی راگەیاند: "ئەمڕۆ دەست دەكرێت بە تۆماركردنی ناوی قەوارە و لایەنەكان بۆ ھەڵبژاردنی داھاتووی عێراق، ئەو پرۆسەیە تا 16/1/2020 بەردەوام دەبێت. ھاوپەیمانێتی لایەنەكان ئەگەر لەو ماوەیە رانەگەیەندرێت، دواتر قبوڵ ناكرێت".

روونیكردەوە: "خۆتۆماركردنی لیست و قەوارەكان لە نووسینگەی سەرەكی كۆمسیۆنە لە بەغدا، بەڵام دواتر بۆ خۆتۆماركردنی كاندیدەكان لە نووسینگەكان دەبێت".

گوتیشی: "كاندید دەتوانێت تەنیا لە یەك بازنە ناوی خۆی تۆمار بكات، بە پێچەوانەوە ئەگەر لە بازنەیەك زیاتر ناوی خۆی تۆمار بكات ئەو كاندیدە دووردەخرێتەوە".

بڕیارە مانگی حوزەیرانی ئەمساڵ ھەڵبژاردنی پێشوەختەی پەرلەمانی عێراق بەڕێوەبچێت، لەمڕۆوە قەوارە و ھاوپەیمانێتییەكان دەتوانن لە كۆمسیۆنی باڵای ھەڵبژاردنەكانی عێراقیش خۆیان تۆمار بكەن، دوای ئەوەش پرۆسەی خۆتۆماركردنی كاندیدەكان دەست پێدەكات.