عێراق و ئوردن شارێکی پیشەسازی دادەمەزرێنن
K24 - ھەولێر
بڕیارە گەورەترین شاری پیشەسازی لەنێوان عێراق و ئوردن دابمەزرێت و لە رێگەیەوە 100 ھەزار ھەلیكار برەخسێنرێت.
دەستەی شارە پیشەسازییەكانی سەر بە وەزارەتی پیشەسازی عێراق رایگەیاند، دامەزراندنی شاری پیشەسازی بە یەكێك لە گرنگترین پڕۆژەكان دادەنرێت، كە بۆی ھەیە ئابووری وڵات پێشبخات و ژماری بێكارانیش كەمبكاتەوە، ئەوە بێجگە لە دابینكردنی بەرھەمی ناوخۆ و رێگەگرتن لە ھاوردەكردنی ھەڕەمەكی.
ئاماژەی بەوەشدا، ھەماھەنگییەكی ھاوبەش لەنێوان ھەردوو وڵات ھەیە، بۆ ئەوەی ئەو پڕۆژە گرنگ و كاریگه‌ر دابمەزرێت كە بە شارێكی ئابوورییانە ناودەبرێت، رووبەرەكەی 4 ھەزار و 800 دۆنمە، دوو ناوچەی ئازاد و پیشەسازی لەخۆدەگرێت و لە رێگەیەوە 100 ھەزار ھەلی كار بۆ خه‌ڵكی ھەردوولا دەرەخسێندرێت.