پەرلەمانتارە كوردەكانی ئێران: بێڕێزی به كولتوورمان ده‌كرێت
K24 – ھەولێر:
سەرجەم پەرلەمانتارە كوردەكان لە پەرلەمانی ئێران لەنامەیەكدا بۆ رێبەری ئێران رەخنە لە راگەیاندن و كەناڵە فەرمییەكانی ئێران دەگرن و بە گوتەی ئەوان، لە ئێران بێڕێزی بە كلتوری كەمینە نەتەوەییەكان و بەتایبەت كورد دەكرێت.
ئەمڕۆ دووشەممە، نوێنەری شارەكانی رۆژھەڵاتی كوردستان لە پەرلەمانی ئێران نامەیەكیان بۆ عەلی خامنەیی، رێبەری ئێران ناردووە، دەقی نامەكەش لە راگەیاندنەكاندا بڵابووەتەوە.
ئەو پەرلەمانتارە كوردانە لە نامەكەیاندا دەڵێن: لە كەناڵە فەرمییەكانی ئێران بێڕێزی بە كلتورو ھونەری كەمینە نەتەوەییەكان دەكرێت.
گوتیشیان: بەردەوامبوونی ئەو بێڕێزییە یەكگرتوویی و ئاسایشی نیشتمانی ئێران دەخاتە مەترسییەوە.
ئەو نامەیە دوای ئەوە ھات، لەچەند رۆژی رابردوودا گرتەیەكی ڤیدیۆیی بڵاوكرایەوە، كە بێژەری كەناڵێكی ئێران بە جلوبەرگی كوردی دەڵێت، جلی شوانان.