بانکی خوێنی هەولێر 2000 کیسی خوێن بۆ سلێمانی دەنێرێت
K24 – هەولێر:
دکتۆر سانع ئەبابەکر بەڕێوبەری بانکی خوێنی هەولێر، بە کوردستان24ـی راگەیاند، بەهۆی نەبوون و کەمبوونی کیسی خوێن لە بەڕێوبەرایەتی بانکی خوێنی سلێمانی، سبەی (سێشه‌ممه 28ـی تشرینی دووه‌می 2023)، 2000 کیسی خوێن بۆ بەڕێوبەرایەتی بانکی خوێنی سلێمانی دەنێرن.
بەڕێوبەری بانکی خوێنی هەولێر گوتیشی: "بەهۆكاری نوێکردنەوەی گرێبەست و ناردنی کیسی خوێن بۆ کوالێتی کۆنترۆڵی بەغدا، ماوەیەکە وه‌زاره‌تی ته‌ندروستی عێراق کیسی خوێنی نەناردووە، بووه‌ته هۆکاری کەمبوونی کیسی خوێن لە تەواوی عێراق".
دکتۆر سانع گوتیشی: حکومەتی هەرێمی کوردستان و وەزارەتی تەندروستی بە بەردەوام و لە نزیکەوە چاودێری دۆخەکەیان کردووە و بڕیار بووە کیسی خوێن بکڕن و بینێرن بۆ بانکەکانی خوێن.
بەپێی زانیاریەکانی کوردستان24، بڕیارە هەفتەی داهاتوو وەزارەتی تەندروستی عێراق کیسی خوێن بۆ هەرێمی کوردستان بنێرێت.
