ئەنجامی پشکنینی نەورەسەکانی سەر زێی بچووک ئاشکرا کرا
K24 – ڕانیە:
بەهۆی گۆڕانکاری کەشوهەواوە کۆمەڵێک باڵندەی کێوی لە جۆری نەورەس لەسەر زێی بچووک تووشی نەخۆشییەکی تایبەت بوون و لە ڕاگەیەندراوێکدا بەڕێوەبەرایەتی پۆلیسی داراستان و ژینگەی ڕاپەڕین ڕایگەیاند، ئەنجامی پشکنینەکان دەرکەوتووە کە نەخۆشییەکە ڤایرۆسییە.
ڕۆژی هەینی (10ـی ئایاری 2024) بەڕێوەبەرایەتی پۆلیسی داراستان و ژینگەی ڕاپەڕین ئاماژەی بەوەکرد: بە هەماهەنگی لەگەڵ بەڕێوەبەرایەتی ڤێتەرنەری ڕاپەڕین، بەدواداچوونیان بۆ نەخۆشکەوتنی باڵندە کێوییەکانی سەر زێی بچووک کردووە و چارەسەرێکی سەرەتاییان دۆزیوەتەوە.
بەپێی ئەو ڕاگەیەندراوە، دوای ئەوەی پشکنینیان بۆ ئەو باڵندانە کردووە، بڕیاریانداوە بە لەیەک جیاکردنەوەی باڵندە نەخۆشەکان و بەردەوام بوون لە چاودێریکردن و چارەسەرکردنیان.
هاوکات ئاماژەی بەوەشکردووە: لە ئەنجامی پشکنینەکان دەرکەوتووە کە نەخۆشییەکی ڤایرۆسییە.
