فڕۆکەخانەی نێودەوڵەتی هەولێر ڕاستی بڵاوبوونەوەی گرتە ڤیدیۆیەک ئاشکرا دەکات

فڕۆکەخانەی نیودەوڵەتی هەولێر لەبارەی بڵاوبوونەوەی گرتە ڤیدیۆیەک لە تۆڕی کۆمەڵایەتی لەسەر گەشتیارێکی عێراقی کە هەڵگری پاسپۆرتی فینلەندایە ڕوونکردنەوەیەکی بڵاو کردووەتەوە و دەڵێت: ئەوەی هاووڵاتییە عێراقییەکە بڵاوی کردووەتەوە، دوورە لە ڕاستی.

دووشەممە 3ـی شوباتی 2025، فڕۆکەخانەی نێودەوڵەتی هەولێر ڕوونکردنەوەی بڵاو کردووەتەوە و دەڵێت: دوابەدوای بڵاوبوونەوەی گرتە ڤیدیۆیەک لە تۆڕە کۆمەڵایەتییەکان کە تیایدا گەشتیارێکی عێراقی هەڵگری پاسەپۆرتی فیلەندییە بەناوی (عەلی عەبدولڕیاز)، سکاڵای هەیە لەسەر هەڵسو کەوتی کارمەندی نشینگە و پاسەپۆرتی فڕۆکەخانە، گوایە بەشێوازێکی ناشرین هەڵسوکەوتی لەگەڵ کراوە، بەگوتەی خۆی بۆ ماوەی کاتژمێرێک ڕاگیراوە.

فڕۆکەخانەی نێودەوڵەتی هەولێر دەڵێت: بەڕای گشتی ڕادەگەیەنین، دوای لێکۆڵینەوە و بەدواداچوون لەسەر ئەم بابەتە دەرکەوت کە ئەم گەشتیارە گوتەکانی بێ بنەمان و دوورن لە ڕاستی، ئەمەی خوارەوە ڕاستی بابەتەکەیە.

ئەم گەشتیارە لەڕێکەوتی 31-٠1-2025 لە کاتژمێر 01:30ی شەو دەگاتە بەردەم کارمەندی نشینگە و پاسەپۆرت، دوای ئەوەی گەشتیارەکە پاسپۆرتی خۆی کە پاسپۆرتی فیلەندییە پێشکەشی کارمەندی پاسپۆرت دەکات، کارمەندەکە ئەرکی خۆی جێبەجێ دەکات، دەردەکەوێت کەوا مۆری دەروازەیەکی وشکانی نێوان پارێزگای بەسرا و وڵاتی کوەیت ناڕوونە، بۆیە دەبێتە جێگای گومان، دوای (7) خولەک وردبینی، بەناچاری ڕەوانەی ژووری ئەفسەری ئێشکگری دەکات هەروەکو لە کامێرای چاودێری وردەکاری پڕۆسەکە دیارە.

فڕۆکەخانە دەڵێت: لەکاتژمێر 01:37 ناوبراو دەگاتە ژووری ئەفسەری ئێشکگری، بە مەبەستی بەدواداچوون و چارەسەری کێشەکە، بۆ ماوەی (13) خولەک لەژووری ئەفسەرەکە دەمێنێتەوە.

لەکاتژمێر 01:50 ڕێگای پێده‌درێت گەشت بکات، لەکاتژمێر 01:58 ناوبراو بەشێوەیەکی ئاسایی و به‌ ‌ڕێزه‌وه‌ گەشتەکەی ئەنجام دەدات، ئەمە ڕاستی و دروستی بابەتەکەیە هەر وەک ئەوەی لە تۆماری کامێرای چاودێری دەرکەوتووە.

دەڵێن: ئێمە لە فڕۆکەخانەی نێوده‌وڵه‌تی هه‌ولێر ئەم چەواشەکارییانە ڕەتدەکەینەوە کە مەبەست لێی لەکەدارکردن و ناوزڕاندنی فڕۆکەخانەیە.