هەسەدە و دیمەشق لەبارەی گەڕەکە کوردنشینەکانی حەلەب ڕێککەوتن
هێزەکانی سووریای دیموکرات و ئیدارەی نوێی وڵاتەکە، لەبارەی گەڕەکە کوردنشینەکانی پارێزگای حەلەب، ڕێککەوتن، بە پێی ڕێککەوتنەکە گەرەنتی پاراستنی دامەزراوە مەدەنییەکانی هەردوو گەڕەکەکە و ئازادکردنی سەرجەم دەستگیرکراوان دەکرێت.
سێشەممە 1ـی نیسانی 2025، وەزارەتی ناوخۆی سووریا لە ڕاگەیەندراوێکدا، ڕێککەوتنی نێوان هێزەکانی سووریای دیموکرات "هەسەدە" و ئیدارەی نوێی وڵاتەکە، لەبارەی گەڕەکە کوردنشینەکانی ئەشڕەفییە و شیخ مەقسوود لە پارێزگای حەلەب ڕاگەیاند.
وەزارەتەکە ئاماژەی بەوە دا، بە پێی ڕێکەوتنەکە هێزە کوردییەکان لە هەردوو گەڕەکی ئەشڕەفییە و شیخ مەقسوود دەکشێنەوە.
هەروەها هەردوولا ڕێککەوتن لەسەر پاراستنی دامەزراوە مەدەنییەکان لە هەردوو گەڕەکەکەدا و ئازادکردنی سەرجەم دەستگیرکراوەکان.
هەر بە پێی ڕاگەیەندراوەکەی وەزارەتی ناوخۆی سووریا، هەسەدە و دیمەشق، لەسەر ئاسانکاری هاتووچۆ لەنێوان هەردوو گەڕەکە کوردنشینەکد و ناوچەکانی باکووری ڕۆژهەڵاتی وڵاتەکە ڕێککەوتن.
ئەم هەنگاوەش دوای نزیکەی مانگێک دێت لە ئیمزاکردنی ڕێککەوتنێک لە نێوان مەزڵوم عەبدی، فەرماندەی گشتیی هێزەکانی سووریای دیموکرات و ئەحمەد شەرع، سەرۆکی قۆناغی ڕاگوزەری وڵاتەکە بۆ تێکەڵکردنی هێزە کوردییەکان لە سوپای نوێی سوریادا.
