Leşkerekî Kurd di êrîşa Azerbeycanê de hat kuştin

K24 - Navenda Nûçeyan

Leşkerekî Kurd ê Êzdî ku leşkerê artêşa Ermenîstanê bû bi hawana Azerbeycanê hat kuştin.

Li ser sînorê Ermenîstan û Azerbeycanê, di encama êrîşa hêzên Azerî de leşkerekî Kurd ê Êzdî yê Ermenistanê canê xwe ji dest da. Artêşa Azerbaycanê, hêzên Ermenistanê yên li ser sînorê Qerebaxê da ber topan.

Redaktorê rojnameya Kurdî ya ‘Riya Teze', Mirazê Cemal li ser rûpela xwe ya Facebookê eşkere kiriye ku di encama wê êrîşê de leşkerê Kurd ê Ermenistanê Fîdar Aloyan (19 salî) canê xwe ji dest daye.

Li gor agahiyên Mirazê Cemal, Aloyan salek e di artêşa Ermenistanê de leşkerî dikir. Demeke dirêj e di navbera Ermenistan û Azerbeycanê de li ser herêma Qerebaxê nakokî heye.