Siyasî

Hevjîna Demîrtaş: Deng bidin Demîrtaş û azadiyê

Başak Demîrtaş hevjîna berbijarê HDPê ji bo Serokatiya Tirkiyê Selahedîn Demîrtaş, li Diyarbekir dengê xwe da û ji welatiyan xwest ku beşdariyê di hilbijartinan de bikin.

Kurdistan24 Hewlêr 2018/06/24 06:31

kurdistan Hilbijartinên Tirkiyê2018 HDP Demîrtaş

K24 - Navenda Nûçeyan

Îro Yekşemê 24/6/2018an, Başak Demîrtaş hevjîna berbijarê HDPê ji bo Serokatiya Tirkiyê Selahedîn Demîrtaş, li bajarê Diyarbekir dengê xwe da û ji welatiyan xwest ku herin ser sindoqan û beşdariyê di hilbijartinan de bikin.

Başak Demîrtaş piştî dengdanê ji rojnamevanan re got: "Bi lez herin navendên dengdanê û deng bidin Demîrtaş û azadiyê".

Piroseya hilbijartinên Serokatî û Perlemana Tirkiyê îro demjimêr 8ê sibehê bi dema Hewlêr û Enqerê destpê kir û heya demjimêr 5ê êvarî berdewam dibe.

Li seranserî Tirkiyê, bêtirî 56 milyon kes mafê wan yê dengdanê heye û ji bo wergirtina postê serokkomar 6 berbijar hevrikiyê dikin û li ser 600 kursiyên Perlemanê jî, du hevpeymanî û sê partiyên siyasî di nava hevrikiyê de ne.

Selahedîn Demîrtaş yek ji berbijarên Serokatiya Tirkiyê ye û ev bû bêtirî sal û nîvekê di zindanê de ye.

Demîrtaş di dawîn peyama xwe de got: "Heger HDP derbasî perleman nebe, wê ziyan li tevahiya Tirkiyê bê, lewra piştevanî ji HDPê re, bi wateya piştevanî ji demokrtiyê re ye".

N.O