Firokxaneya Besrayê bi mûşekan hat armanckirin
K24 – Navenda Nûçeyan
Medyaya Iraqê belav kirin, îro 4 mûşek li firokxaneya Besrayê ketin, ku konsolxaneya Amerîka tê de ye.
Jêderekî ewlehiyê ji medyaya Iraqê re ragihand, îro firokxaneya Besrayê bi 4 mûşekan hate armanckirin, bêyî ku ti zanyariyên din bide.
Ev çendîn roj in xwepêşandan li Besra berdewam in û di bîst û çar demjimêrên derbasbûyî de, xwepêşanderan çendîn avahiyên Hikûmî û bi dehan baregehên mîlîşyayên ser bi Îranê ve şewitandin.
Her duh jî ku xwepêşanderan navê “Îna Xezebê” li xwepêşanda bajarê Besre li başûrê Iraqê kirin û êrîşî konsolxaneya Komara Islamî ya Îranê kirin û şewitandin.
Ji aliyê xwe ve jî, Îranê jî daxwaz ji welatiyên xwe kiribû, bilez ji Besrayê derkevin.
Li gor Wezareta Tenduristiyê ya Iraqê, di xwepêşandanên duhî de 3 kes hatin kuştin û zêdetir ji 50 kesên din jî birîndar bûn.
Her wê derbarê de jî, îro parlemanto Iraqê derbarê rewşa li Besrayê rûniştineke awarte encam dide.
S. B