Demîrtaş: Dadgeh nikare biryara azadkirina min bide
K24 – Navenda Nûçeyan
Îro du sal li ser girtina hevserokê berê yê HDP'ê Selahedîn Demîrtaş re derbas dibin. Demîrtaş roja 4'ê Mijdarê ligel 12 parlamenterên HDP'ê hat binçavkirin û vê yekê weke 'Derbeya 4'ê Mijdarê' binav dike.
Demîrtaş ji ajanseke nêzî PKK'ê re axivî û diyar kir, tiştê AKP'ê bi pêvajoya aştiyê xwestiye ew e, îradeya gelê Kurd bidest bixe, vê carê bi girtinan dest bi tesfiyekirin û zextan kir.
Selahedîn Demîrtaş anî ziman, ew nehatine girtin, belkî bi şev avêtine ser mala 12 parlamenteran û ew hatin revandin.
Demîrtaş got, dixwestin em hemû birevin derveyî welat û rêveberên HDP'ê yên mane jî belav bikin. Di vê derbarê de Demîrtaş wiha dibêje: "Du rê li pêşiya me hebûn, yan berxwedan an jî xweradestkitin. Me jî berxwedan hilbijart."
Demîrtaş diyar kir ku wî ti carî daxwaza azadkirinê nekiriye û got, "Ez ne girtî me, ez dîlekî siyasî me. Yê biryara girtina min daye û yê biryara azadkirinê jî bide, ne dadgeh e. Dadgeh nikarin biryara azadkirina min bidin."
Selahedîn Demîrtaş roja 4'ê Mijdara 2016'an ligel 12 parlamenterên din hatin binçavkirin û biryara girtina 9 parlamenteran hat dayîn.
S. B