Tirkiye: Partiyên Kurdistanî li dijî yasaya bingehîn in

Serdozgerê Komarê ya Dadgeha Bilind Mehmet Akarca eşkere dike, naveroka bernameya partiyên Kurdistanî li dijî yasaya bingehîn e

K24 – Navenda Nûçeyan

Serdozgerê Komarê ya Dadgeha Bilind Mehmet Akarca eşkere dike, naveroka bernameya partiyên wekî Partiya Sosyalîsta Kurdistanê (PSK), Partiya Komûnîst a Kurdistanê, Partiya Azadiya Kurdistanê (PAK), Partiya Demokrata Kurdistanê - Tirkiyeyê (PDK-T) li dijî yasaya bingehîn e û ji ber vê tohmetê wî daxwaza girtina van her çar partiyan kiriye.

Serdozgerê Komarê ya Dadgeha Bilind Mehmet Akarca got: “Avabûn û xebatên rêxistinî yên partiyên siyasî ger dijî yasayan be em lêpirsîn didin destpêkirin û ger pêwîst be em daxwaza girtina wan ji Dadgeha Yasaya Bingehîn dikin. Di vê çarçoveyê de me dît ku naveroka bernameya 4 partiyên siyasî dijî yasaya bingehîne û me daxwaza girtina Partiya Demokrata Kurdistana Tirkiyeyê, Partiya Sosyalîsta Kurdistanê, Partiya Azadiya Kurdistanê û Partiya Komûnîst a Kurdistanê ji dadgeha yasaya bingehîn kir.”

Li ser vê pirsê Serokê Giştî yê Platforma Demokratên Kurdistanê (PDK) Sertaç ji K24ê re got jî: “Yasa û siyaseta dewleta Tirkiyê gelek dijayetî Kurdan dike, nahêlin Kurd partiyeke xwe bi nasnameya xwe bi navê Kurd û Kurdistanê ava bikin û xebateke sivîl, demokratîk û siyasî bikin. Siyaseta dewleta Tirkiyê siyaseteke kevin e, her tim dixwazin Kurd partiyên Kurdî wek partiyên ne demokratîk û terorist nîşan bidin.”

Herwiha Serokê Partiya Azadiya Kurdistanê (PAK) Mustefa Ozçelîk ji K24ê re gotibû,  “Partiya wan rewa ye û li gor madeya 90 ya Qanûna Bingehîn a Tirkiyê, doza girtina partiya me ne yasayî ye.”

 

S. B