Ji Hereketa Azadî û CNK daxûyaniya Şingalê!

Derheqê rêkeftina Şingalê de daxûyaniya Hereketa AZADÎ û CNK'yê ya hevpar wiha ye:

Kurdistan24 Hewlêr 2020/10/25 13:33

kurdistan Şingal Kurdistan Pêşmerge Iraq Herêma Kurdistanê Hereketa Azadî CNK

Navenda Nûçeyan (K24) - Hereketa Îslamî ya Kurdistanê (Hereketa AZADÎ) û Ciwanên Netewî yên Kurdistanê (CNK) derheqê rêkeftina Hewlêr-Bexda ya li ser Şingalê daxûyaniyek weşandin.
Di daxûyaniyê ev rêkeftin ji bo avakirin û ewlehiya Şingalê wekî gavekî baş nirxand.

Daxûyaniya Hereketa AZADÎ û CNK'yê ya hevpar wiha ye:

"Hikûmeta Herêma Kurdistanê û Hikûmeta Federal a Bexdayê di 10ê Cotmehê de bi amanca asayîkirina rewşa Şingalê, avadankirina bajêr û destnîşankirina îdareyeke fermî rêkeftinek îmzekirin. Bi rêkeftina wê peymanê re bi hezaran Êzdî yên niha li kampên penaberên ê Herêma Kurdistanê ne, bi hezaran Êzdiyên li serê Çiyayê Şingalê di çadiran de dijîn û Nûnerên Rûhanî û Siyasî yên xelkê Êzdî kêfxweşiya xwe anîn ziman û bi germî pêşwazî li wê rêkeftina dîrokî kirin.

Weke di xalên rêkeftinê jî de diyar in amanca Hikûmeta Herêma Kurdistanê ya serekî ew e: wlehî û aramî li Şingalê peyda bibe û xelkê Şingalê vegerin ser zeviyên xwe û malên xwe û xizmetguzarî ji xelkê re were pêşkêşkirin û hêzên neyasayî ji Şingalê derkevin.

Piştî îmzekirina rêkeftinê Nûnerên wekî; Neteweyên Yekgirtî, Welatên Kendava Erebî, Yekitiya Ewropayê û Amerîkayê û Brîtanyayê li Herêma Kurdistanê û Iraqê pîroz kirin û kêfxweşiya xwe ji rêkeftinê re anîn ziman û amaje bi wê yekê kirin ku xalên rêkeftinê di demeke nêzîk de werin bicîkirin.

Li aliyê din rêxistina milîsên şîe ya ser bi Îranê Heşdî Şabî ku niha li Şingalê metirsiyê li ser xelkê Şingalê çêdike û mezargehên Êzdiyan xirab dike û mezargehên îmamên şîe li Şingalê çêdikin. Komara Îslamî ya Îranê, Serokwezîrên berê yên Iraqê ku bi dijmaniya wan a ji kurdan re ji aliyê herkesî ve tê zanîn Heyder Îbadî û Nûrî Malîkî nerazîbûnên xwe nîşan dan û li dijî wê rêkeftinê derdikevin.

Mixabin li aliyekî din jî PKK, YBŞ û di herî dawiyê de jî HDPê jî dijberiya xwe ji rêkeftinê re aşkere kirine ku ew wê rêkeftinê nasnakin.

Meşrûiyeta Komara Îslamî ya Îranê û Heşdî Şabî ku rojane ciwanên kurd qetil dikin li nava rayagiştî ya kurdan û hemû cihanê cihê nîqaşê ye. Herwiha hîn jî destê serokwezîrên berê yên Iraqê Heyder Îbadî û Nûrî Malîkî bi xwîna Êzdiyan sor e û ew nikarin nîqaşê li ser heqê Êzdiyan bikin. Cihê daxê ye, ew partiyên ku bi serpereştiyê HDPê navê xwe wek “Tifaqa Kurdistanî’’ danîne piştî daxuyaniya HDP bê deng man. Ev bê dengî tê wateya ku di gruba bîr û tevgerên Îranê de bi zanatî yan jî bi nezanî cîh digirin û dijberiya rêkeftina Şingalê dikin.

Em piştevaniyê li her hewleke Hikûmeta Herêma Kurdistanê dikin di warê asayîkirin, vegera penaberan û parastina Şingalê. Şingal axa Êzdîyan e Şingal Kurdistanê ye û çarenivîsa wê jî xelkê Êzdî yên Şingalê, Nûnerên Siyasî û Ruhanî yên Şingalê diyar dikin. Divê rêxistinên Kurd destêwerdanê di kar û barên Şingalê de nekin û piştevaniya Hikumeta Herêma Kurdistanê bikin.

Em bang li hemî partî, rêxistin û xelkê Kurdistanê dikin ku hûn jî piştevaniya li wê rêkeftinê bikin û li xeta netewayetî cihê xwe bigrin."

Hereketa Îslami ya Kurdistanê / Hereketa AZADÎ
Ciwanên Netewî yên Kurdistanê / CNK