Hatûçûna di navbera Herêma Kurdistanê û bajarên Iraqê de hat rawestandin

Lijneya Bilind a Rûbirûbûna Koronayê ya Herêma Kurdistanê çend biryarên nû derbarê hatûçûna ligel parêzgehên din ên Iraqê derxistin.

Hewlêr (K24) – Lijneya Bilind a Rûbirûbûna Koronayê ya Herêma Kurdistanê çend biryarên nû derbarê hatûçûna ligel parêzgehên din ên Iraqê derxistin.

Li gor daxuyaniya Wezareta Navxwe ya Herêma Kurdistanê, hatûçûna navbera parêzgehên Herêmê û parêzgehên Iraqê tê rawestandin.

Di daxuyaniyê de hat eşkerekirin ku ajans û rêxistinên Neteweyên Yekbûyî, rêxistinên navdewletî, Hevpeymaniya Navdewletî, dîplomat û şandên fermî, welatiyên ku nişteciyên Herêma Kurdistanê ne, kesên nexweş ku pêwîstiya wan heye li nexweşxaneyên Herêma Kurdistanê tedawî bibin, bazirgan û veberhêner li derveyî vê biryarê ne.

Hat ragihandin ku karê bazirganî dê di navbera Herêma Kurdistanê û parêzgehên Iraqê de berdewam bibe tevî liberçavgirtina hemû rêkarên xwepêraziyê.