Piştî 7 salan ji êrîşa DAIŞê, hîn 525 kesên gundê Koco winda ne

Heft sal di ser jenosayidkirina gundê Koco ve derbas dibin, 17 gorên bikomî jî lê hatin dîtin.
kurdistan24.net

Şingal (K24) – Heft sal di ser dagîrkirin û jenosaydkirina gundê Koco ji aliyê çekdarên DAIŞê ve derbas dibin. Gelek xelk vî gundê Şingalê hatin şehîdkirin û windakirin, beşeke mezin ji keç û jinên wî gundî ketin destê teroristên DAIŞê. Piştî rizgarkirina wî gundî jî, 17 gorên bikomî hatin dîtin.

Berî jenosaydkirina gundê Koco, xelkê wî bi gundî hemû boneyên xwe yên civakî û olî bi coş û xweşî dikirin, lê ji 15/8/2014an ve û di şeveke tarî de, çekdarên DAIŞê êrîşî ser Koco kirin, gund wêran kir û gundî jî kuştin û revandin.

Keça Emê, yek ji rizgarbûyên destê DAIŞê ye, ew ji nava 1250 kesan, ligel 19 kesên din ji destê DAIŞê rizgar bû û heta niha 31 kes ji malbata keçê winda ne.

Keçê ji K24ê re got: “Piştî DAIŞê di 3ê Tebaxê de êrîşî Şingalê kir, gundê Koco heta roja 15ê Tebaxê dorpêçkirî ma. Me xort û ciwanan karî xwe xilas bikira, lê me hesabê dapîr û kalemêrên xwe kir, wan nedikarîn xwe xilas bikin, ji ber wê em ji gund derneketin û DAIŞê êrîş kir û dagîr kir.”

Heft sal in dayikên gundê Koco ji ber dûriya kesûkarên xwe dinalin, birînek li dilê wan e û bê derman e. Jineke gund jî çîroka revandina xwe ji aliyê DAIŞê ve bi bîr tîne û dibêje: “DAIŞê hemû kesûkarên me li ber çavên me kuştin û em revandin û birin Sûriyê û em ji hev dûr xistin.”

Gundê Koco dikeve qubleta çiyayê Şingalê, berî hatina DAIŞê 1700 kes lê dijiyan. Piştî 12 rojan ji dorpêçê, DAIŞê roja 15ê Tebaxê êrîşî ser gund kir û xelkê gund jenosayid kir. Piştî rizgarkirina gund jî, 17 gorên bikomî hatin dîtin ku termê 400 kesî tê de bûn. Heta niha jî 525 kesên din jî winda ne.