Ji bo pirtûkxaneya Kurdî romaneke nû: DÎNO

Nivîskar û rojnamevan Sevda Kaplan di vê romanê de behsa evîndarî û xiyaneta li nava jiyanê dike.
author_image İlyas Aslanhan
Romana "Dîno"
Romana "Dîno"

Diyarbekir (K24) – Nivîskar û rojnamevan Sevda Kaplan romana xwe ya nû çap kir, ku di vê romanê de behsa evîndarî û xiyaneta li nava jiyanê dike.

Sevda Kaplan ji K24ê re behsa armanca nivîsandina vê romanê eşkere kir û got: “Nivîskarên jin heta niha pirsên evîndarî û erotîzmê di berhemên xwe de baş veneguhestine nava tekstên edebî. Min jî weke jinekê, bi wêrekî xwest ku vê mijarê derxînim pêş.”

Li ser naveroka romanê Kaplan diyar kir: “Di çîrokê de behsa du karekteran tê kirin, him behsa evîndarî, him behsa xiyaneta ji nava jiyanê ye, min xwest dilbijandin û xwestekên erotîkî bi zelalî formule bikim. Çîrok ji nava jiyanê bi xwe ye. Ji çavdêriya derdorê min e, hinek jî xeyalên min tê de hene.”

Nivîskar û rojnamevan Sevda Kaplan destnîşan dike: “Pirsa erotîzmê û evîndariyê çiqasî pirseke têkilhev be jî, çiqasî ev têgeh hevdû dahf bidin jî, çiqasî formata xwe biguherînin jî, pirsgirêk bi hemû tazîbûna xwe di pirtûkê de derdikeve qadê. Bi ya min çîrok û sahneyên erotîk dê di edebiyata Kurdî de aliyek din, qadeke din ji bo jinên nivîskar veke.”

Kaplan eşkere kir ku ev romana wê, yekem pirtûka wê ye ku li Bakurê Kurdistanê ji aliyê Wezanxaneya J&J ve tê çapkirin, beriya niha jî pirtûkek nivîsandiye û li Herêma Kurdistanê bajarê Duhokê ji aliyê Weşanxaneya Xanî ve hatiye çapkirin.

Sevda Kaplan ku nêzîkî 28 sal in karê rojnamevaniyê dike, diyar kir: “Carina weke bêjerek, carina weke nivîskarek carina jî weke peyamnêrek min kar kiriye. Hîn jî karê xwe di qada ragihandina Kurdî de weke peyamnêrek didomînim. Dem dem min berê xwe daye şaxên çanda Kurdî jî. Klîbeke min a helbesta Kurdî jî heye. Nivîskarî, çand û rojnemegerî ji hevdû cûda nabînim.”

Nivîskar û rojnamevan Sevda Kaplan
Nivîskar û rojnamevan Sevda Kaplan