Hevdîtinên Serokê Herêma Kurdistanê di roja duyem a Konferansa Asayîşê ya Munichê de

Serokê Herêma Kurdistanê di roja duyem a Konferansa Asayîşê ya Munichê de, ligel hejmarek ji berpirsên pilebilind ên welatên cîhanê civiya

Navenda Nûçeyan (K24) – Serokê Herêma Kurdistanê Nêçîrvan Barzanî li perawîza roja duyem a Konferansa Asayîşê ya Munichê, ligel hejmarek ji berpirsên pilebilind ên welatên cîhanê civiya.

Di çalakiyên roja duyem a Konferansa Asayîşê ya Munichê de, Serokê Herêma Kurdistanê îro 19ê Sibata 2022an, ligel Nûner û endama Komîta Hêzên Leşkerî ya Encûmena Nûneran a Amerîka Elissa Slotkin civiya.

Hevdîtina Serokê Herêma Kurdistanê Nêçîrvan Barzanî ligel Berdevkê Komîta Karûbarên Derve ya Parlamentoya Ewropayê Nils Schmid

Herwiha Serokê Herêma Kurdistanê di çalakiyên roja duyem a Konferansa Asayîşê ya Munichê de, di hevdîtinekê de ligel Berdevkê Komîta Karûbarên Derve ya Parlamentoya Ewropayê Nils Schmid, rewşa siyasî ya Iraqê, pirsa koçberên li sînorê Belarusê, gefên DAIŞê û dirêjkirina dema erkê hêzên Almanî li Iraqê guftûgo kirin.

Nêçîrvan Barzanî ji bo hevkarîkirina di pirsa koçberan û dirêjkirina dema erkê hêzên Almanî li Iraqê, spasiya Almanya û welatên din ên Ewropa kir.

Her du aliyan, pirsa demokrasîyê, avakirina saziyan û xurtkirina wan li Iraqê û Herêma Kurdistanê guftûgo kirin û hevnêrîn bûn ku Alman û welatên dost dikarin di vê derbarê de hevkar bin.

Konferansa Asayîşê ya Munichê duhî 18ê Sibata 2022an bi beşdariya Serokê Herêma Kurdistanê Nêçîrvan Barzanî, Serokwezîrê Herêma Kurdistanê Mesrûr Barzanî û hejmarek ji serok û berpirsên pilebilind ên welatên cîhanê dest pê kir û heta roja 20 vê mehê berdewam dibe.