Nivîsgeha Netewên Yekgirtî êrîşa mûşekî ya li ser Hewlêrê şermezar dike

Navenda Nûçeyan (K24) – Nivîsgeha Netewên Yekgirtî li Iraqê (UNAMI) di twîttekê de, êrîşa mûşekî ya îro berbangê li ser parêzgeha Hewlêrê şermezar kir.

Nivîsgeha Netewên Yekgirtî li Iraqê di twîtta xwe de ragihand, UNAMI êrîşa mûşekî ya li ser Hewlêrê bi tundî şermezar dike. Daxwaz ji Iraqiyan hatiye kirin ku bi yek helwestê rûbirûyî her karekî bibin ku bibe cihê binpêkirina serwerî û yekîtiya xaka Iraqê, yan jî mebest jê têkdana aramî û yekrêziyê be.

Nivîsgeha Netewên Yekgirtî li Iraqê ji sala 2004an ve vekirî ye û kar û çalakiyên xwe bi awayekî bêalî bi mebesta alîkariya hikûmeta Iraqê di pêşvebirin û parastina mafên mirovan de pêk tîne.

Îro 13/3/2022an demjimêr 1 piştî nîvê şevê, hejmarek ji mûşekan li hin navçeyên Hewlêrê û nêzîk avahiya sereke ya saziya Kurdistan24ê ketin xwarê û di encamê de ziyanên madî derketin.