Nêçîrvan Barzanî: Divê bersiva yekalîker ji bo êrîşan were dayîn

Serokê Herêma Kurdistanê li ser êrîşên şeva borî yên DAIŞê yên li çend parêzgehên Iraqê, peyamek belav kir.
Serokê Herêma Kurdistanê Nêçîrvan Barzanî
Serokê Herêma Kurdistanê Nêçîrvan Barzanî

Hewlêr (K24) – Serokê Herêma Kurdistanê Nêçîrvan Barzanî li ser êrîşên şeva borî yên DAIŞê yên li çend parêzgehên Iraqê, peyamek belav kir û ragihand: “Êrîşên DAIŞê zengila metirsiyeke cidî ye, divê bi cidî helwest li ser were nîşandan û bersiva yekalîker were dayîn.”

Nêçîrvan Barzanî di peyama xwe de diyar kir: “Zincîre êrîşên şeva derbasbûyî li deverên parêzgehên Bexda, Diyala, Selahedîn û Kerkûkê li ser hêzên çekdar û polîsên federaliyê Iraqê ku di encamê wan êrîşan da 7 şehîd û zêdetir ji 20 birîndaran hebûn, zengila metirsiyeke cidî ye.”

Herwiha destnîşan kir: “Tevger û bihêzbûna DAIŞê û berfirehbûna kiryar û êrîşên wê, yên li ser asayîş û seqamgîriya tevaya Iraqê gefek rasteqîne ye ku pêdivî ye bi awayekî cidî helwest li hember wan gefan bêne wergirtin û bersivek cidî bêne dan.”

Serokê Herêma Kurdistanê diyar kir: “Ji bona rûbirûbûna wan êrîşên DAIŞê, pêdivî ye alîkarî û hevahengiyek çalaktir di navbera leşker û hêzên çekdar û Pêşmerge û saziyên emnî yên Iraq û Herêma Kurdistanê de hebe. Herwiha pêdivî ye piştgiriya Hevpeymaniya Navdewletiya dijî DAIŞê ji bo Iraq û Herêma Kurdistanê berdewam be.”

Di beşeke din a peyama Nêçîrvan Barzanî de hat diyarkirin: “Rewşa emnî û siyasî ya Iraqê, hevkarî û karê hevbeş ji tevaya hêz û aliyên Iraqî tê xwestin ku hemû bi hev re vê rewşa dijwar derbas bikin û êdî rewşa aloz ya siyasî nebe sedema têkçûna asayîş û seqamgîriyê û zêdetir bihêzbûna DAIŞê.”

Nêçîrvan Barzanî di dawiya peyamê de diyar kir: “Ji bo malbat û kesûkarên şehîdan sersaxiyê dixwazim, hevsoz û hevxemê wan im, hêvîdar im hemû birîndar zûtirîn dem çak bibin.”