Wezîrê Rewşenbîrî û Ciwanan hevtayê xwe yê Ermenistanê vexwende Hewlêrê

Hewlêr (K24) – Wezîrê Rewşenbîrî û Ciwanan ê Herêma Kurdistanê Hemey Hemeseîd ku bi serokatiya şandeke wezaretê li Yerîvana paytexta Ermenistanê ye, îro ligel Wezîrê Perwerde û Zanist û Xwendina Bilind û Kultûrî yê Ermenistanê civiya.

Şanda Wezareta Rewşenbîrî û Ciwanan îro sêşemê 9ê Tebaxa 2022yan serdana Dîwana Wezareta Perwerde û Zanist û Xwendina Bilind û Kultûrî kir û ji aliyê wezîr Vehram Domanyan û wekîlên wezaretê ve hat pêşwazîkirin.

Di civînê de rayedarên Ermenistanê kêfxweşiya xwe ji bo karê hevbeş nîşan dan û spasiya şanda Kurdistanê kirin, ku serdana monumênta jenosîda Ermenan kiriye.

Wezîrê Rewşenbîrî û Ciwanan ê Herêma Kurdistanê Hemey Hemeseîd jî bi girîngî behsa pêwendiya kultûrî ya navbera gelan kir û hevtayê xwe yê Ermenistanê vexwende Hewlêra paytexta Herêma Kurdistanê.

Hemey Hemeseîd daxwaz kir, hikûmeta Ermenistanê girîngiyê bide beşa Kurdî ya Radyoya Yerîvanê û rojnameya Riya Teze. Her du aliyan diyariyên xwe weke nîşaneya dostaniyê pêşkêşî hev kirin.

Şanda Wezareta Rewşenbîrî û Ciwanan serdana xizmetguzariya parastina jîngeha dîrokî û muzexaneyê kir û piştre jî serdana perestgeha "Ziyaret" a Êzidiyên Ermenistanê kir.