Nêçîrvan Barzanî daxwazek arasteyî aliyên siyasî yên Iraqî kir

"Divê rûmeta saziyên dewletê parastî be û rêgirî li erk û karên wan neyê kirin.”
Serokê Herêma Kurdistanê Nêçîrvan Barzanî
Serokê Herêma Kurdistanê Nêçîrvan Barzanî

Hewlêr (K24) – Serokê Herêma Kurdistanê Nêçîrvan Barzanî li ser pêşhateyên Bexdayê peyamek belav kir.

Di peyamê de Serokê Herêma Kurdistanê nîgeraniya xwe li ser bûyerên îro yên Bexdayê nîşan daye û ragihandiye: “Em ji nêz ve û bi nîgeraniyeke kûr ve li pêşhateyên siyasî û ewlehî yên îro yên Bexda û çend cihên din dinêrin. Em ji hemû aliyan daxwaz dikin ku nehêlin rewş ji vê zêdetir ji kontrolê derbiçe.”

Nêçîrvan Barzanî destnîşan kiriye: “Xwepêşandana aştiyane, mafekî destûrî yê parastî ye, lê belê alozî û ragirtina saziyên dewletê ti kêşeyekê çareser nake û rewşê aloztir dike, loma divê rûmeta saziyên dewletê parastî be û rêgirî li erk û karên wan neyê kirin.”

Li ser rol û erkê hêzên ewlehiyê, Nêçîrvan Barzanî tekez kiriye: “Li ser hêzên ewlehiyê pêwîst e ku bi agahdarî û hişyarî ligel rewşê tevbigerin û rê neyê dayîn ku xwepêşandan û bûyer bibin sedema têkçûna zêdetir a rewşa ewlehiyê û ketina qurbaniyan di navbera Iraqiyan de.”

Herwiha diyar kiriye: “Rewşa welat zanabûn û vegera mentiq û destpêkirina gotûbêjeke niştimanî û berpirsane û hevkariya hemûyan dixwaze, da ku Iraq ji vê rewşa dijwar rizgar bibe.”

Di dawiya peyama xwe de Serokê Herêma Kurdistanê Nêçîrvan Barzanî behsa helwesta Herêma Kurdistanê kiriye û dibêje: “Em car din tînin ziman ku Herêma Kurdistanê wek her dem hevkar dibe ji bo çareserî û hevtêgihîştina aliyên Iraqî, loma em car din hemû hêz û aliyên pêwendîdar ên Iraqî bang dikin ku werin li Hewlêrê bicivin û dest bi gotûbêjeke cidî ji bo derbaskirina vê rewşa aloz a welat bikin.”