Îranê sizayê darvekirinê ji bo xwepêşanderekî din jî der kir

Hewlêr (K24) – Li Îranê bi tometa beşdarbûna xwepêşandanan, sezayê darvekirinê derbarê welatiyekî din der kir.

Nêzîkî çar meh in xwepêşandan li bajar û bajarokên Îranê berdewam in, ku bûye sedema kuştina bi sedan kesan û desteserkirina bi hezaran welatiyên Îranê.

Li gor zanyariyên malpera Mîzan Online a nêzîkî desthilata dadweriyê ya Îranê, sizayê darvekirinê ji bo Cewad Rûhî yê welatiyên Îranê, bi tometa şewitandina Qurana Pîroz û ziyangihandina milkê giştî, derçûye.

Bi vê yekê, ew kesên sizayê darvekirinê li Îranê derbarê wan de derçûye, gihîşte 18 kesan û biryara darvekirinê li ser 4 kesan hatiye cîbicîkirin.

Ji ber desteserkirina keça Kurd Jîna Emînî ji aliyê polîsê exlaqê yê Îranê ve û piştre canjidestdana wê, zêdetirî çar meh in xwepêşandan li bajar û bajarokên Îranê berdewam e û bi sedan kes hatin kuştin.

Piraniya xwepêşandanan ji aliyê hêzên ewlehiya Îranê ve hatine tepeserkirin û li gor amarên ku saziyên mafên mirovan belav kirine, heta niha nêzîkî 550 xwepêşander hatine kuştin û zêdetirî 18 hezar kes hatine desteserkirin.