Li Diyarbekirê ji bo bîranîna Mela Mistefa Barzanî şitlên daran hatin çandin

Diyarbekir (K24) – Dezgehê Xêrxwazî ya Barzanî, bi boneya 120emîn salvegera jidayîkbûna Nemir Mela Mistefa Barzanî şitlên daran li Diyarbekirê çandin.

Ji roja yekem a erdheja li Bakurê Kurdistanê û Tirkiyê, Dezgeha Xêrxwazî ya Barzanî li bajarên ku ji ber erdhejê zirar û ziyan dîtine, xebatên xwe yên alîkariyê didomîne, herwiha li Diyarbekirê jî, ji bo ziyandîtiyên erdhejê û malbatên hejar, di pêşkêşkirina xwarinên germ de berdewam e.

Karmendên dezgehê, bi boneya 120emîn salvegera jidayîkbûna Nemir Mela Mistefa Barzanî, li Diyarbekirê ji zarokan re pêlîstok û şêniyên taxekê re jî gul belav kirin.

Dezgeha Xêrxwazî ya Barzanî ji bo bîranîna Mela Mistefa Barzanî, darên zeytûnan jî çandin.

Karmendên dezgehê ji Kurdistan24ê re ragihandin ku ew ê alîkariyên xwe bidomînin û bi taybetî di meha Remezanê de ji bo malbatên hejar, xwarina fitarê bidin.

Şêniyên taxa Seyrantepe diyar kirin ku ew ji alîkariyên dezgehê kêfxweş in û ew hêvî dikin ku alîkariyên wan berdewam bin.