Komîsyona Hilbijartinan: Em nikarin roja 25ê Sibata îsal hilbijartinên Parlamentoya Kurdistanê bikin

Navenda Nûçeyan (K24) – Komisyona Serbixwe ya Hilbijartinan bi fermî Serokatiya Herêma Kurdistanê agahdar kir ku ew nikarin hilbijartinên Parlamentoya Kurdistanê di 25ê Sibata 2024an de pêk bînin.

Berdevkê Komîsyona Serbixwe ya Hilbijartinan Dr. Îmad Cemîl ji K24ê re ragihand, Komîsyona Hilbijartinan a Herêma Kurdistanê ji ber paşxistina biryara Dadgeha Federal a li ser kursiyên pêkhateyan heta 21’ê vê mehê, komisyon nikare hilbijartinên parlementoyê di 25ê Sibata 2024an de pêk bîne.

Diyar kir jî, wan bi fermî Serokatiya Herêma Kurdistanê agahdar kiriye û daxwaza kirine bi lihevkirin rojeke din bo hilbijartinên parlamentoyê bê diyarkirin.

Roja 3ê Tebaxa 2023an, Berdevkê Serokatiya Herêma Kurdistanê Dilşad Şehab ragihand, Serokê Herêma Kurdistanê roja 25ê Sibata 2024an wek roja encamdana hilbijartinên Parlamentoya Kurdistanê diyar kir û hemû alî raspartine ji bo encamdana rêkarên pêwîst.