Pirtûka “Kurdistan + 100” behsa rewşa Kurdistanê ya sala 2046an dike

kurdistan24.net

Diyarbekir (K24) – Pirtûkek bi navê Kurdistan + 100 hatiye çapkirin ku Selahettîn Demîrtaş jî tê de, 13 nivîskarên Kurd bi çîrokên xwe behsa rewşa Kurdistanê ya sala 2046an de dikin ku gelo di 100 saliya Komara Mahabadê de, Kurdistan dê çi rewşê de be. Pirtûk ji aliyê weşanxaneyek Londonê ve di çarçoveya projeyek de hatiye çapkirin.

Li Londonê di çarçoveya projeyek bi navê neteweyên bêdewlet de pirtûkek bi navê Kurdistan + 100 hatiye çapkirin. Di pirtûkê de Selahettîn Demîrtaş jî tê de, ji her 4 parçeyên Kurdistanê 13 nivîskaran çîrok nivîsîne û behsa Kurdistana sala 2046ê dikin ku rastî 100 saliya Komara Mahabadê tê. Pirtûka ku ji 13 çîrokan pêk tê bi zimanê Ingilîzî hatiye çapkirin.

Nivîskarên ku di pirtûkê de cih digirin amaje dikin ku pirtûkek hêja û girîng e ku pirtûkên bi vî rengî giringiya xwedîlêderketina destkeftiyên neteweyî yên kurdan jî nîşan didin.

Muharrem Erbey ku yek ji nivîskarên pirtûkê ye ji K24ê re got: “Ji aliyê Comma Press ve projeyek bo neteweyên bindest û bêdewlet hatiye amadekirin, Mustafa Gundogdû yê karê sînema û rojnamegeriyê dike  û Orsola Casagrande yê Îtalî ye ku dostê kurdan e û ser pirsa kurd nivîsên wî hene edîtoriya pirtukê dikin.”

Amadekarî tên kirin ku îsal pirtûka bi navê Kurdistan + 100 li herêmên Îspanyayê yên wek Bask û Katalonyayê de jî bi zimanên baskî û Katalanî were çapkirin û li Amerîkayê jî dê were çapkirin. Pirtûka ku ji çîrokên fantastîk jî pêk tê de nivîskaran xeyal û pêşbiniyên xwe parve kirine.

Nivîskar Omer Dilsoz jî dibêje: “Zanyerek şikefta Şanîdarê de dixebite reenkarne dibe û xwe li NASAyê dibîne û li wê derê maddeya reş bidestdixin ku bi wê maddeye geşta navbera cîhanan de pêkan e. Kurdek bo wê geştê tê şandin û di.e cîhanek din a wek cîhana me ku her tişt li wê derê berovajiyê wê cîhanê ye û Kurd serdest in.”

Pirtûka bi navê Kurdistan + 100, 8 meh berê li Londonê hatiye çapkirin û bi zimanê Ingilîzî ye, nivîskarên pirtûkê bang li weşanxaneyên kurdî jî dikin ku  bi zimanê kurdî jî pirtûkê çap bikin.