Ektera Kurd a Sûrî Canyar Hesen: Li ser Efrînê xemgîn im
K24 – Navenda Nûçeyan
Hunermenda Kurd a dramaya Sûrî Canyar Hesen radigihîne, ew dixwaze hunermend û sînemagerên Kurd nas bike û dixwaze di sînemaya Kurdî de kar bike. Derbarê rewşa Efrînê de jî got: Ez xemgîn im.
Ektera Kurd Canyar Hesen di perawîza beşdariya wê di Heftemîn Festîvala Navdewletî a Fîlman li Duhokê di hevpeyvînekê bi K24ê re da zanîn, ev cara yekem serdana Herêma Kurdistanê dike û bi vê serdanê beşdariya wê di Heftemîn Festîvala Navdewletî a Fîlman li Duhokê û naskirina gelê Kurd li Herêma Kurdistanê gelekî kêfxweş e.
Canyar Hesen diyar kir, ew dixwaze hunermend û sînemagerên Kurd nas bike û dixwaze di sînemaya Kurdî de kar bike.
Amaje bi wê kir jî, di du rojên destpêkê de hin pirsgirêk derbarê têgihîştina zaraveya Kurdî a Başûrê Kurdistanê de li cem wê hebû, ji ber ku hin cudahî di navbera zaraveya Efrînê û ya Başûrê Kurdistanê de heye, lê piştre ew fêr bû û karî têbigihê wê zaraveyê.
Ektera dramaya Sûrî Canyar Hesen ku ji Efrînê ye li ser rewşa Efrînê got: Min bîra Efrînê kiriye û li ser rewşa Efrînê xemgîn im.
Hunermend Canyar Hesen ji Efrînê ye û ji sala 2010an ve di rêzefîlmên drama Sûrî de kar dike û ji navdartirîn rêzefîlma tê de beşdar bûye bi navê (Bab El Hara) ye. Herwiha rol di hejmarek rêzefîlmên de girtiye.
S. B