Salane pêwîtiya Tirkiyê bi 5 ta 7 milyar Dolar bi enerjiyê heye

Li Tirkiyeyê di nava 16 salan de pêwîstiya li enerjiyê ji %90 zêdetir bûye.
kurdistan24.net

 

K24 – Stenbol

Saziyên li ser veguherîna enerjiya Tirkiyê dixebitin ragihandin ji bo ku Tirkiyê pêwistiyên xwe yên enerjiyê pêk bîne hersal pêwîstî 5 heta 7 milyar dolaran heye. Di kombûna pisporên enerjiye ragihandin li Tirkiyeyê di nava 16 salan de pêwîstiya li enerjiyê ji %90 zêdetir bûye.

Li Tirkiyeyê saziyên li ser veguherîna enerjiye dixebitin raporeka berfireh li ser veberhênanên enerjiya Tirkiyeyê belav kir. Li gor vê raporê ji bo berdewamiya veguherîna sektorên enerjiya Tirkiyeyê heta sala 2030î hersal pêwîstî li 5 heta 7 milyar Dolaran heye. Di raporê de herwiha hat ragihandin li dinyayê gelek bankayên veberhênan û geşepêdanê ji bo berdewamî û berhemdariya enerjiyê milyar dolaran xerç dikin. Di vê kombûnê de yek ji pisporê enerjiyê Cahît Buyukbaş ragihand li Tirkiyeyê dinava 16 salan de pêwîstiya li enerjiyê ji %90 zêdetir bûye û ji bo vê pêwîstiyê salane li Tirkiyê 90,4 GW elektrîk tê hilberandin.

Pisporê Enerjiyê Cahît Buyukbaş got: ''Li Tirkiyeyê Ji bo pêkanîna pêwîstiya li ser enerjiyê heta niha 110 milyar Dolar veberhênan hatiye kirin. Tenê ji bo veguherîna enerjiye salane nêzîkî 4 milyar dolar veberhênan tê kirin. Herwiha ji bo berhemdariya enerjiyê jî zêdetirî 10 milyar dolar veberhênan hatiye kirin. Piştî niha xebatên li ser berhemdariya enerjiyê dê zêdetir bên rojevê.''

Di kombûnê de yek ji pisporê Enerjiyê Selahatin Hakman jî rêbazên ku ji bo bidestxistina veberhênanê bên kirin ragihand û diyar kir li gel pêşveçûna teknolojiyê divê tirkiyê zêdetir berê xwe bide enerjiyên paqij.

Pisporê Enerjiyê Selahattîn Hakman dibêje: ''Ji bo bidestxistina enerjiyê kêmkirina karbonê,pêşveçûnên teknolojik û kêmkirina xercan wekî dahatê bandoreke giring li ser veberhênanê dike.Eger kompaniyên enerjiyê van guherînên çêdibin li gel hev dinav hemahengiyê gotûbêj bikin bi baweriya min ji bo berdewamiya veberhanên sektora enerjiyê gaveke mezin dê bê avêtin.''

Di vê rapora ku ji bo veguherîna enerjiyê hatî belavkirin de hat ragihandin heta niha ji bankayên Tirkiyeyê ji bo sektora enerjiyê nêzîkî 45 milyar dolar û ji bankayên derveyî Tirkiyê jî nêzîkî 12 milyar dolar veberhênan hatiye kirin û ev rêje jî li gor pêwîstiyan hersal zêdetir dibe.