Şêwekarên Kurd êş û azarên gelê xwe bi rengan derdibirînin

K24 – Navenda Nûçeyan

Şêwekarên Kurd bi reng û tabloyan êrîşa artêşa Tirkiyê ser Rojavayê Kurdistanê û êş û azarên gelê Kurd belge dikin.

Komela Reng Art ji roja destpêkirina êrîşa artêşa Tirkiyê ser gund û bajarên Rojavayê Kurdistanê ve, dest bi kampîneke xêzkirina tabloyan kirine, tê de Şêwekarên Kurd tawan û binpêkirinên di dermafê gelê Kurd û Rojavayê Kurdistanê de tên kirin nîşan didin.

Berpirsê Rêvebir ê Komela Reng Art Welîd Zêno di vê derbarê de ji K24ê re ragihand, kampîna wan berdewam e û tê de hejmarek ji şêwekarên Kurd êş û azarê gelê xwe bi hest û rengên xwe di tabloyan de derdibirînin.

Da zanîn jî, armanca vê kampînê ew e, bobelat û karesatên ji aliyê artêşa Tirkiyê û mîlîşyayên çekdar ve li ser gelê Kurd û Rojavayê Kurdistanê tê kirin, di tabloyan de belge bikin û ji bo bandorekê li raya giştî ya cîhanê bike, ta ku ev êrîşa hovane bê rawestandin.

Hunermend Welîd Zêno bi wê jî kir, pêştir wan kampîneke wiha li ser dagîrkirina Efrînê û şewitandina dexl û danên cotkarên Kurd li Rojavayê Kurdistanê kirine.

S. B