Hêzên Rûsî li şûna hêzên Amerîkî li firokxaneyeke Kobanê bicih dibin

K24 – Navenda Nûçeyan

Hêzên Rûsî li şûna hêzên Amerîkî li binkeyeke serbazî ya esmanî li Kobanê bicih dibin û herêma gerên xwe li Rojavayê Kurdistanê berfireh dikin.

Efserê ji Polîsa Serbazî ya Rûsyayê Sefer Seferov ji rojnamevanan re ragihand, piştî hêzên Amerîkî ji binkeya Sirîn a esmanî li Kobanê vekişiyane, niha hin amadekarî û karên endezyarî lê tên kirin, ji bo hêzên Rûsî lê bicih bibin.

Wî efserê Rûsî da zanîn jî, Hêzên Polîsên Serbazî di hefteya bûrî de dest danî ser binkeya Sirîn a esmanî û hin helîkopterên Rûsî lê bicih bûne, ji bo çavdêriya gerên Rûsî li herêmê bikin.

Diyar kir jî, hêzên Amerîkî dema vekişiayne, generatorek û hin kelûpelên nivîsgehan li şûna xwe hîştine.

Efserê Rûsî amaje bi wê kir, piştî hêzên Amerîkî ji navçeyê vekişiyane, erkê wan li bakurê Sûriyê berfirehtir bûye û niha Minbic û derdora wê jî lixwe digire.

Piştî vekişîna hêzên Amerîkî ji bajarê Kobanê û Minbicê, roja 17ê vê mehê hêzeke Polîsa Serbazî ya Rûsî derbasî bendava Tişrînê ya di navbera Minbic û Eyn Îsayê de bû.

Li ser biryara Serokê Amerîka Donald Trump di dema dawî de hêzên Amerîkî ji bajarê Kobanê, Minbic û Eyn Îsayê vekişiyan, lê beşek ji hêzên wê ji bo parastina kêlgehên petrolê, li rojhilatê Qamişlo, Hesekê û Dêrazorê mane.

S. B