Gavên Tirkiyê li bakûra Suriyê

K24- Enqere

Serokkomarê Tirkiyê Erdogan di civîneke rojnamevanî de ragihand ku ji bo awakirina dewereke ewle, mijara Minbic û vekêşîna hêzên Amerîkayê ji Sûriyê dibe ew ku bi rayadarên Amerîkayê re hevdîtinan pêk bînin. Li gel vê yekê Tirkiye veguhestina hêzên xwe ber bi sînorê Rojavayê Kurdistanê didomîn e û karwanên leşkerî yên Tirkiyê gihîştin ser sînorê Girêspî û Kobanê. Beramerî vê yekê alikariyên bo YPGê jî berdewam in.

Gelo di bin siya gemaroyên Amerîka ku ji ber S 400 dê li ser Tirkiyê karîger bike, Tirkiye dê bikaribe di van mijaran de bi Amerîkayê re li hev bike?

Li gorî serokê Navenda lêkolînên Rojhilata Navîn Ahmet Uysal, niha hevîdtin navbera Enqere û Washîngtonê de hene. Tirkiye dê bikeve nava rojhelatê çemê Feratê û Amerîka jî dê bi şertekê qada bejahî û hewayî pêşiya Tirkiyê weke.

Prof.Dr.Ahmet Uysal -Pisporê Rojhilata Navîn, got: Ev heyameke dirêje tê axaftin operasyonên bo ser Minbic û Rojhelatê çemê Feratê û Avakirina devereke wele, tenê hatibû paşxistin. Tirkiye hemû amadekariyên xwe kirine û dê heta devereke sînorkirî bikeve nava rojhelatê çemê Feratê. Amerîka jî bi egera ku mûşekên s 400 neyên aktîvkirin û maweya bi temamî radestîkirina wan her bê dirêjkirin dê destûreke sînorkirî bide Tirkiyê û ji bo vê yekê jî niha hevdîtin têne kirin.

Beramberî van daxuyaniyan Pisporê Pêwendiyên navdewletî Seyfettîn Erol jî dibêje Tirkiyê tevî hemû nerazîbûnên Amerîka S 400 anîn, loma di qada Sûriyê û Deryaya Spî de her du welat dê bên beramberî hev du û Amerîka dê her rêyê biceribîne ku Tirkie nekeve Rojava û dewereke ewle ava neke.

Prof.Dr.Seyfettîn Erol - Pisporê Pêwendiyên Navdewletî, dibêje: Tirkiye tevî hemû gefên Amerîka dê berê xwe bide Rojhelatê Çemê Feratê û dê bo avakirina dewereke ewle hewl bide. Lê belê Amerîka alikariyên bo YPGê berdewam dike û li ser sînor ji bo bicihkirina hêzên hevpeyman amadekariyan dike da ku Tirkiye operasyonekê pêk neîne û devera ewle ava neke. Herwiha li Sûriyê û Deryaya Spî Amerîka û Tirkiye dê bên beramberî hev û heta egera bi temamî têkçûna pêwendiyan jî zêde ye.

Tirkiye niha hêzên xwe liser sînorê Girêspî, Kobanê û Serêkaniyê kom dike û Tê îdîakirin, Tirkiye dîwarê ser sînorê Girêspî rakiriye û amadekariya operasyonekê tê kirin. Pispor jî amaje dikin piştî hevdîtinên Enqere û Washîngtonê dê nexşerêya operasyona Tirkiyê zelal bibe.