Peyama Nêçîrvan Barzanî, cêgirê serokê Partîya Demokrata Kurdistanê li salvegera 16yê Tebaxê
K24- Hewlêr
Bi boneya 73yemîn salvegera damezirandina Partîya Demokrata Kurdistanê pîrozbahîyê li cenabê serok Barzanî, Mekteba Sîyasî, Serkirdayetî, tevaya (Liq, Navçe, Rêkxraw û binkeyan), malbatên Şehîdan, kadir û cemawerê Partîya Demokrata Kurdistanê dikim.
Damezrandina PDKyê li sala 1946 badokeke dîrokî bû li Kurdistanê, her ji wê demê ve, îradeya Kurdistanîyan, bi hemû pêkhateyan ve, bo azadîyê û pêşkevtinê, bû hêz û bizaveka rêkxistî û seranserî. Damezirandina PDKyê bû destpêka vejîyandineke mezina nîştîmanî, neteweyî û çandî di nav civaka Kurdistanê de. Gelê Kurdistanê bû xwedî bizaveke sîyasî, ku di deverê û rojhilata navîn û cîhanê de hisab bo hatkirin. Partîya Demokrata Kurdistanê bi serhildana Şorişa Îlonê, bi rêberînîya Barzanîyê Nemir, bo cara yekê bû xwedî dirêjtirîn û berfirehtirîn şoriş di dîroka hevçerxa Kurdistanê de û şîya cihekê veke bo pişkek ji armancên gelê Kurdistanê di nav rêkkevtineke fermî de li gel hikumeta Îraqê. Ev jî bû cihê destvehînana Îtirafeke cîhanî bi rewayî ya doz û bizava rizgarîxwaza Kurdistanê. Herweha di şorişa Îlonê de PDK bû xwedî mezitirîn hêza şorişvan di rojhelata navîn de.
PDKyê nisko û dijwarî dîtine, lê çunku xwedî bawer bingeheke rehdar a bihêze, tim şîyaye tevaya nisko û dijwarîyan biburîne û chejî veman û serkevtinê be bo Kurdistanîyan. Herweha pişikdareke bihêz bûye di bizava demokrasî û medenî de li Îraqê, lewma jî di dîroka Îraqê de jî xwedî pêgehek bihêze.
Partîya Demokrata Kurdistanê ku şanazîyeke mezin heye ji duristbûn û paraztina piroseya sîyasî û demukrasîya Herêma Kurdistanê û çespandina wê; wek qewareyek di destûra Îraqê de, hevdem jî PDK û PDKyî şanazîya rêvebrina serkevtîyane hene di piroseya avdenakirin, pêşxistina hemealîya Herêma Kurdistanê, paraztina yek rêzî, tebayî, kilturê bi hevre jîyanê û lêburînê de. Qehremanîya endam û cemawerê PDKyê careka din di berevanîya qehremanane ya Pêşmergey, di şerê Daişê de xwe nîşan da ku wek hêza parêzerê azadîya cîhanê, şanazîyeke mezin a cîhanî tomar kir.
PDK wek hêzeke rehdar û bizaveke cemawerîya bingeh berfireh, xwedî hêzeke gelek bihêza avedanî, nûvebûn û pêşkevtinê ye. Xort, Xwîndkar û afretên PDKyê hezeke mezin hene bo kar û avedankirina Kurdistanê. PDK bi piştîvanîya xebatkarên dêrîn û bi ezmûn û cemawerê dilsojê Kurdistanê, bihêztir dibe, her ji ber evê yekê jî bû, di hilbijartinên Herêma Kurdistanê û Îraqê de serkevtineke mezin bi dest xwe anî. Ji niha û paş jî, PDK bi karname û pilanên berfirehtir dikare zêdetir xizmeta doz û armancên gelê Kurdistanê bi hemû pêkhateyan ve bike.
Careke din ev bîrewerîye li hemû Kurdistanîyan pîroz be.
Nêçîrvan Barzanî
Cêgirê serokê Partîya Demokrata Kurdistanê
15/8/2019