دیدگەها مەسرور بارزانی بو ئاشتی و سەقامگیریا دەڤەرێ

Kurd24

ل دەما زێدەبوونا ڤان گڕژی و ئالووزیێن روژهەلاتا ناڤەراست، کۆربەندێ ئاشتی و ئاسایێشا روژهەلاتا ناڤەراست کو ب مێپس دهێتە نیاسین ب چاڤدێریا مەسرور بارزانی سەروکێ حکومەتا هەرێما کوردستانێ بو ب سەکویەکێ گرنگ ژ بو دیالووگ، و دیدێن جیاواز لسەر پرسێن هەستیارێن جیهانێ ب گشتی و دەڤەرا روژهەلاتا ناڤەراست ب تایبەتی. زێدەبوون و کاریگەریێن جودا جودا یێن شەرێن وەکە ئیسرائیل و حەماس، گورانکاریێن جەمسەری د قادا نیڤدەوولەتیدا و جموجولێن نوی و ڤاڤارتنا هەڤپەیمانیان و کاریگەریێن وان ل دەڤەرێ چەقێ ناڤەروکا ڤێ کۆنفراسا ناڤهاتی بوویە.

پەیامێن مەسرور بارزانی:

سەروکێ حکومەتا هەرێما کوردستانێ بەرێز مەسرور بارزانی گەلەک ب روونی و ئاشکەرا  ئەو داخواز ژ عیراقیان ب گشتی و حکومەتا عیراقێ ب تایبەتی کر کو خو ململانێین دناڤبەرا حەماس و ئیسرائیلێ بپارێزیت. چونکە حکومەتا عیراقێ بخو و گورەپانا سیاسیا ڤی وەلاتی د دەمێن هەستیاردا دەرباز دبیت و کێشەیێن زور جددی و تەححەدیاتێن ناڤخوویێن ڤی وەلاتی بەرگەیا چ کێشەیێن دیێن دروستکری ل ڤی وەلاتی ناگریت و هەر تێکهەلچوونەک یان تێوەگەلانەک د ناڤا ڤی شەڕێ ناڤهاتی کو حەزا هندەک هێزێن بیانیێن دەڤەرێیە دێ عیراقێ بەرەڤ عاقارەکێ نەدارڤە بەت. ئەڤا هەنێ دەربرینێ ل دیدەکا پراگماتیکی بو جیوپولیتیکا ئالووزا دەڤەرا روژهەلاتا ناڤەراستدا دکەت و تێگەهشتنەکا پێویستە لسەر بەردەوامیدانا ئێمناهیا ناڤخوویی کو ئەڤ چەندا هەنێ ڤیابیت ژ ئەولەویاتێن هەمی لایەنێن سیاسیێن عیراقی و دەڤەرێ بیت. هەروەسا گەهاندنا پەیاما روون و ئاشکەرا یا جەنابێ سەروکوەزیران لسەر پرسا کورد تەوەرەکێ گرنگ بوو د ناڤا ڤێ کۆنفراسا ناڤهاتیدا. بەرێز مەسرور بارزانی ل دەما ئاماژەدانێ ب هەبوونا رەوایەتیێ ب چارەیا 2 دەولەتیێ بو کێشا فلستین و ئیسرائیلێ ئاماژە ب خالەکا گرنگ کر کو هەروەک مافێ کێشا فەلەستین و ئیسرائیلێ مافێ گەلێ کوردە کو ب هێز و دادپەروەریا بو کەسێن دی حەلالە بو گەلێ کورد ژی حەلال و رەوا بیت و نابیت کومەلگەها نیڤدەوولەتی و وەلاتێن ب باندوورێن دەڤەرێ چاڤپووشیێ ل ڤی ماف و کەرامەتێ بکەن.

دناڤبەرا دێڕاندا:

پەیامێن بەرێز مەسرور بارزانی ل کۆربەندێ مێپس گەلەک فڕەرەهەند بوون لسەر پرسێن گورانکاریێن کەشوهەوا و باندوورێن وێ، پرس و ئاریشەیێن گەنجان، پرسێن سامانێن سروشتی و یەکسانی و هەمەرەنگیا کومەلگەهێ. ئەڤ چەندا هەنێ هەلگرێ چەند پەیامەکان بو هەم بو ناڤخوویا هەرێما کوردستانێ، هەم بو حکومەتا عیراقێ و وەلاتێن جیران ل دەڤەرێ کو گرنگیدان ب ڤان پرسێن ناڤهاتی گرنگیدانە ب پرسێن ئاسایێشا دەڤەرێ و بەردەوامیدانە ب پرەنسیپێن ئاسایێشا ناڤخویی و ئاسایێشا ناوچەیی کو پێکڤە هەلگرێ رێێبازەکا هەڤسەنگ و پراگماتیکینە. گرنگیدانا جەنابێ سەروکوەزیران ب پرسێن هەمەرەنگیا کومەلگەهێ، ئێکسانی و گورانکارینێن کەشوهەوا تێگەهشتنەکە ل پرسسێن جیهانی و کاریگەریێن ڤان پرسان لسەر رەوشا ناڤخوویی. سەروکوەزیران بارزانی تەریکز لسەر گرنگیا چاکسازیەکا گشتگیر و ئاشکەرا کر د تەڤایا سێکتەرێن گرنگێن کومەلگەهەکا ڤەکری کو ئەڤ چەندا هەنێ رویێ سەرکردەیەکێ پابەند ب پرسێن مودێرنکرن و باشترکرنا باردۆخێ ژیانێ ل هەرێما کوردستانێ دئینیتە پێش.

دەرئەنجام و ئاسوویێن پاشەروژێ:

هێزا مەسرور بارزانی بو کومڤەکرنا پانێلەکا وەها بەرفرە و هەمەرەنگ ل سەر ئاستێ ناڤخوویی و نیڤدەوولەتیدا ل دەم و ساتێن هوسا هەستیار و گرنگر بو هەرێما کوردستانێ و دەڤەرێ ئاماژەیەکا رونە بو سەرکردایەتی و دیدگەها جەنابێ وان بو مودەرنیزەکرنا هەرێما کوردستانێ د هەمی سێکتەرێن گرێدایی ب ژیارا روژانەیا هاوولاتیانڤە. ئەو هەلسوکەوت و ڤەرێژا کۆربەندێ دڤێ قوناغا پڕی ئالنگاڕی ل دەڤەرێ، دەرخەڕێێ گەشەکرنا ڕولێ هەرێما کوردستانێ یە وەکە هێزەکا سەقامگیر و پێشکەفتنخواز ل دەڤەرەکا پڕی ئاڵووزی و ئالنگارێن جودا. هەروەسا پێگەهێ هەرێما کوردستانێ وەکە پردەکا نویی هەولدان ژ بو ناوبژیوانیێ ل پرسێن هەرێمی و نیڤدەوولەتیدا تاکو دهێت روونتر دبیت و وێنەیەکێ نوی یێ ئاکتەرێ سەقامگیریێ ب کار و کردار ئینایە د گورەپانا سیاسیا دەڤەرێدا.

ئەو تشتێ فێربووین:

کۆربەندێ مێپس بیرئینانەوەیەکا گرنگ بوو کو سەرەرایی ململانێ و دوودلیێن نها ل دەڤەرێ پەیدا بوویی، سەرکردەیەکێ مینا مەسرور بارزانی ل دەڤەرێ هەنە کو ئامادەبن سەڕەرایی چەندەها تەحەددیێن ناڤخوویی و دەڕەکی دەستپێشخەریا دیالوگێ بو چارەسەریا وان ئالنگاری و ئالووزیێێن بەروکا دەڤەرێ گرتی بکەت. ئەو گەنگەشە و دیدگەهێن دناڤا ڤێ کۆنفراسێ ناڤهاتیدا هاتینەکرن دیدگەهەکە بو داینامیکێ ئالووزێ دەڤەرێ و رێنەمایێن گرنگ بوون ژ بو چەوانیا سەرەدەریکرنێ بو کردەوەیێن سیاسی و دیپلوماسیێن داهاتی ب تایبەتی د دەم و ساتێن نهاتا کو هاڤێتنا هەر پێنگاڤەکا خەلەت د گورەپانا سیاسی و قادا نیڤدەوولەتیدا دشێت وەلاتێن دەڤەرێێ بەرەڤ ئالووزێن دژوار ببەت.

پەیاما مەسرور بارزانی لسەر ئاستێ ناڤخووی و نیڤدەوولەتیدا:

لسەر ئاستێ ناڤخوویی مەسرور بارزانی پەیامەکا رون هەبوو و گرنگیدا ب پرسا چاکسازی و دیجیتالکرنا کاروبارێن ئیداریێن باژار و باژاروکێن هەرێمێ بێ جیاوازیا ناوچەیی، هەروەسا گرنگیدان ب پرسا بێکاریا گەنجان کو ئەڤ چەندا هەنێ ئاماژەیەکا ڕون بوو ب پابەندبوونێ ب پاشترکرنا باردوخێ ژیانێ ل هەرێمێ کو ئەڤ چەندا هەنێ ئێک ژ هەولێن سەرەکیێن کابینەیا 9ێ یا حکومەتا هەرێما کوردستانێ نە کو ببیتە حکومەتا هاوولاتیان. هەروەسا ب رون و ئاشکەرا ئینانە لسەر زمان کو ب چ ئالتەرناتیڤەکێ ژ بلی مافێ هاوولاتیبوونەکا سەربلند و یەکسان بو هاوولاتیێن هەرێما کوردستانێ بەرامبەر بەغدا رازی نابیت چونکە ئەڤ چەندا هەنێ مافێ رەوا و یاسایێ هەمی چین و تەخێن جودایێن ڤێ هەرێما دەستوڕی و ئێکلاکەرە د گورەپانا سیاسیا عیراقێدا.

لێدوانێن بەرێز مەسرور بارزانی سەبارەت ب کومپانیایێن نەفتێ و مافێن دەستوریێن هەرێما کوردستانێ لسەر ڤان پرسێن ناڤهاتی، تەرکیزێ دکەتە لسەر ستراتیژیەتا هەرێما کوردستانێ  ب بوون ب کارئاکتەرەکێ گرنگ د بازارێ ئەنەرجیێ د قادا نیڤدەوولەتیدا. کوردستان ب پاراستنا مافێن هەڤبەشێن خو وەک ئەکتەرەکێ باوەرپێکری و سەقامگیر د گورەپانا نیڤدەوولەتیدا پێگەهێ وێ بەرەڤ هەلکێشانەکا باشە و ئەڤ چەندا هەنێ د داهاتوویەکا نێزیکدا گەلەک باشتر و ب باندوورتر بیت.

ئەنجام د کونتێکستا دیدگەهێ:

کۆربەندێ مێپس ب سەرپەرشتیا مەسرور بارزانی، تێگەهشتنەکا کویر بو ئەو تەحەددیات و دەرفەتێن کو ل روژهەلاتا ناڤەراستدا هەنە نیشاندان، و بو دیالوگەکا ڤەکری ئینانە د گورەپانا گەنگەشەکرنێ. مەسرور بارزانی ب رون و ئاشکەرا بەحسێ ململانێیێن دەڤەرێ و هەروەسا ئەو پرسێن جیهانی مینا باندوورێن کەش و هەوا و گەشەپێدانا ئابووری، ب دیدگەهەکا ڤەکری و مودێرن بو پاشەروژەکا سەقامگیر و ئارام پێشکێشکرن. کو هەر ئەڤ چەندا هەنێ بوویە ئەگەرێ هندێ کو ئەڤ کۆنفراسا ناڤهاتی نەک بتنێ ببیتە سەکویەک بو گەنگەشێ بەلکو ببیتە هیڤی و دەرفەت بو ئێخستە پێشا پێشنیاران بو چارەسەریا وان پرسێن ژ مێژە بەروکا بەرڤپێشچوون و خوشگوزەرانیا دەڤەرا روژهەلاتا ناڤەراستدا گرتی. هەروەسا گرنگە کو ئاماژێ ب وێ زەمینەیا نیڤدەوولەتیا بەرفرە بکەین کو ئەڤ پرسێن هەنێ تێدا رویددەن. ل دەمەکێدا کو روژهەلاتا ناڤەراست بەردەوامە ب بوون ب دەڤەرەکا بەرژەوەندیێن ستراتیژی  ب سامانێن سروشتی، و پێگەهێ جیوپولیتیکیێ و ڕولێ هەرێما کوردستانێ وەکە هێزەکا سەقامگیر و پێشکەفتنخواز تاکو دهێت پتر و گرنگتر دبیت. پێشکەفتنا مەسرور بارزانی د سەرکردایەتیکرنا ڤان جورە گفتگو و دەستپێشخەریان نەک هەر بو کوردستانێ و عیراقێ بەلکو بو هەمی دەڤەرا روژهەلاتا ناڤەراست و ئێمناهیا وێ زورا گرنگە. ل داویێدا کۆربەندێ مێپسێ یا ئەڤ سالە ب سەرپەرشتیا مەسرور بارزانی دەم و ساتەکێ گرنگێ مێژوویی د روژهەلاتا ناڤەراستدا دیارکر کو تێدا دیالۆگ و چاکسازی، و دیدگەه ژ بو پاشەروژەکا باشتر ببیتە سەنتەرێ کارکرنێ د گورەپانا سیاسیدا. ڤیابیت ئەڤ کۆربەندە مینا خالەکا وەچەرخانێ ل دەڤەرێ بهێتە تەماشەکرن، کو چەوانیا سەرەدەریکرنا هەرێما کوردستانێ دگەل ئالنگاریێن ل پێشیا وێ هەمی هەولەکێ ددەت بو ژیانەکا ب رومەت بو هاوولاتیێن خو و هەمی دەما هەولدان ب بەلاڤکرنا توڤێ ئاشتی و پێکڤەژیانێ دایە ل دەڤەرێ.