راگەهاندنا کوردستانێ بەرەڤ کیڤە؟
126 سال ب سەر سالڤەگەرا رۆژنامەگەریا کوردی دەرباز دبن، دەرکەفتنا ئێکەم رۆژناما کوردی بناڤێ کوردستان پێنگاڤەکا ئێگجار گرنگ و پێدڤی بوو، ئەگەر دەرکەفتنا رۆژنامێ بۆ گەلێن دونیایێ جارەکێ گرنگ بیت هەبوونا رۆژنامەگەریا کوردی بۆ گەلێ کوردستانێ یێ بێ دەولەت پتر گرنگیا خۆ هەیە ب وێ ئەندازەیێ هەتا ئەڤرۆ رۆژی.
چەمکێ راگەهاندنێ چەمکێن دی یێن میدیا کلاسیک و مودێرن ب هەمی تا و لقێن خۆڤە بخۆڤەدگریت. لەورا دانوستاندنێ ل دۆر دیرۆکا ناڤگین و ئامرازێن میدیایی ناکەین.
دەرکەفتنا راگەهاندنا کوردی ب هەڤبەرکرن دگەل میدیا جیهانی درەنگتر دەستپێکر، لێ ئەڤ دەستپێکە یا بێ ئاستەنگ و ب سەناهی نەبوو. دیرۆکا راگەهاندنا کوردستانێ یا پرە ژئەڤرازی و نشیڤیان هەتا ب ئەڤرۆیەکا ئازاد راگەهشتی.
بۆ هەلسەنگاندنا میدیایێ پێدڤیە هندەک پیڤەر هەبن و ئەو پیڤەرە ژی دهندەک فلتەرێن زانستی و ئەکادیمیدا دەربازببن، بۆ وەلاتەکێ دیموکراسی ئەگەر پیڤەرێ هەبوونا دەستهەلاتێ، هەبوونا ئوپوزسیونێ، دگەل مەرجێ هەبوونا میدیایەکا ئازاد وەرگرین بێگۆمان دێ تێکەلیەکێ بینین.
گەلەک راستە مە دەستهەلاتا خۆ یا یاسایی و شەرعی یا هەی باوەری ب رادەستکرنا دەستهەلاتێ ب رێکێن شەرعی یا هەی.
لێ ئوپوزسیونا کوردستانێ ب مخابنیڤە نەیا کارایە و نەیا نشتیمانیە بەلکو ناسنامەکا ئاژاوەگێراهەی دناڤبەرا پشکەکا وان سپێدێ ل حکومەتێدانە و ئێڤاریان ئوپوزسیون و ژدویری رەهەندێن نشتیمانی. نڤیسینا ڤان بابەتان ب شێوەکێ راستگویانە پێدڤیەکا حەتمی و گرنگە بۆ جڤاکێمە.
دڤێ ناڤبەرێدا میدیا کوردستانێ ب سەر دووبەرەیێن جودا دابەشدبیت یا جهێ حێبەتیێ دەما میدیا دژی نشتیمانی، وەلاتی، ب ئەجێندایێن دەرڤە و ب زمانێ کوردیێ شرین بکەڤیتە دخزمەتا دژایەتیێدا. یان ژی دەما میدیا دبیتە ئایدولوژیەکا سیاسی ددمەکێدا ئەرکێ میدیایێ گەهاندنا بویەر و رویدانانە ب شێوەکێ راست و دروست و ئازاد و پیشەیی و هەتا رادەیەکی بێلایەنانە، مە نەڤێت دویری ژیواری بەحسێ میدیا کوردستانێ بکەین.
دبەرسڤا وێ پرسیارا میدیا کوردستانێ بەرەڤ کیڤە ژ ئەوا ئەم تێبینی دکەین بەرەف ئاراستەکێ نەدیارە ب تایبەتی دەرکەفتنا سوشیال میدیایێ و باندورا وێ لسەر جڤاکی ژبلی رولێ میدیا کلاسیک لاوازکریە. فەزایەکێ ئازاد و بێ هەبوونا بەرچاڤگرتنا بهایان دچیت ژ ئازادیێن تاکی تاکو بێرێزیکرنا ب بهایێن نشتیمانی ئەم ڤێ چەندێ ب پرۆسەکا ساخلەم و دروست نابینین چارەسەری یاسا و پاشی پێگەهاندنا راست و دروستە.