نەتەوە یەکگرتووەکان: 1.6 ملیۆن بێوەژن لە عێراقدا هەن

"51%ی ئاوارەکان ئافرەتن"

K24-هەولێر

نوێنەری رێکخراوی نەتەوە یەکگرتووەکان لە عێراق بۆ کاروباری ئافرەتان رایگەیاند 1.6 ملیۆن بێوەژن لە عێراقدا هەن و 51%ی ئاوارەکان ئافرەتن.

هیبە قەسەس، نوێنەری رێکخراوی نەتەوە یەکگرتووەکان لە عێراق بۆ کاروباری ئافرەتان لە وتارێکیدا لە پەرلەمانی عێراق بە بۆنەوەی نزیکبوونەوەی هاتنی رۆژی جیهانیی ئافرەتان کە دەکەوێتە رێکەوتی هەشتی مانگی سێی هەموو ساڵێک، گوتی: "هەڵوەشاندنەوەی وەزارەتی کاروباری ئافرەتان دۆخەکە زەحمەتر دەکات لە رووی چارەکردنی پرسەکان و ئاوارەبوون و ململانێکان، بە تایبەت 51% ئاوارەکان لە عێراق ئافرەتن".

نوێنەری نەتەوە یەکگرتووەکان لە عێراق گوتیشی: "1.6 ملیۆن بێوەژن لە عێراقدا هەن و لە دۆخێکی ناهەمواردا دەژین و خوشکانی ئێزیدیمان بوونە قوربانیی رفاندن و بەشودانی بە زۆر لە لایەن رێکخراوی داعشەوە".

ئەمە لە کاتێکدایە بەپێی حکوومەتی هەرێمی کوردستان و رێکخراوە داکۆکیکارەکان لە مافی مرۆڤ بە هەزاران کچان و ژنانی ئێزیدیی لە ناوەڕاستی ساڵی 2014وە لە لایەن چەکدارانی داعشەوە رفێندراون و تا ئێستا بەشێکی زۆریان لە دەستی داعش رزگاریان نەبووە.

ئا: ئا ، ف