كوردستان24 بەرھەمێكی ھونەری بۆ پێشمەرگە كلیپ دەكات
K24 – سۆران
كوردستان24 سپۆنسەری بەرھەمێكی ھونەرمەند چەتۆ نەورۆز دەكات كە گوزارشت لە قارەمانیەتی پێشمەرگە و بەرگریكردن لە گەل و نیشتمان دەكات.
چەتۆ نەورۆز، ھونەرمەندی میوزیكژەن بە (كوردستان24)ی گوت: "ئەم بەرھەمە لە بیرۆكەی خۆمە لەسەر ناو و قارەمانیەتی پێشمەرگە، لە ھۆنراوەی شاعیر محەممەد حاجی قادر، ئاواز و دابەشكردنی خۆم بۆم كردووە، بە دەست و پەنجەی زێڕینی چەندین موزیكژەنی ئۆكێستڕای كوردستان لە ستۆدیۆی سەندیكای ھونەرمەندانی كوردستان لە ھەولێر تۆمار كراوە".
گوتیشی: "لەگەڵ مامۆستا و قوتابیانی پەیمانگای ھونەرەجوانەكانی رواندز كارەكانی كلپی كردنی بەرھەمەكە ئەنجامدەدەین، دوای مۆنتاژكردنی لە لایەن كەناڵی كوردستان24 بەرھەمە بڵاو دەبێتەوە، ئەوە دیارییەكی بچوكی منە بۆ پێشمەرگە قارەمانەكان"
چەتۆ نەورۆز راشیگەیاند: "سوپاسی كوردستان24 دەكەم كە ئەركی كلیپ كردنی ئەم بەرھەمەیان گرتوەتە ئەستۆ كە ئەمە چوارەم بەرھەمە بۆ پێشمەرگە ئەنجامی دەدەم".
چەتۆ نەورۆز، یەكێكە لە موزیكژەنە ئەكادیمییەكانی كوردستان خاوەنی چەندین بەرھەمە و كاری ئاواز و دابەشكردنی بۆ ژمارەیەك ھونەرمەندی كورد كردووە، ھەروەھا وەك مامۆستای ھونەر لە ژمارەیەك كۆلێژ و پەیمانگا و ناوەندی ھونەری وانەی گوتووەتەوە و ئێستاش بەردەوامە.