"به‌ره‌ی مقاوه‌مه‌" هه‌ڕه‌شه‌ی تۆڵه‌كردنه‌وه‌ له‌ ئه‌مه‌ریكییه‌كان ده‌كات

"تۆڵه‌ی خوێن له‌ ئه‌نجامده‌ری ئه‌و تاوانانه‌ ده‌كه‌ینه‌وه‌، تاڵیی تۆڵه‌ به‌ دوژمن ده‌چێژین"
باره‌گاكانی لیوای 14ی حه‌شدی شه‌عبی  دوای بۆردومانكردن
باره‌گاكانی لیوای 14ی حه‌شدی شه‌عبی دوای بۆردومانكردن

K24 - هه‌ولێر:

دوای بۆردومانكردنی بنكه‌ و باره‌گاكانی لیوای 14ی سه‌ر به‌ حه‌شدی شه‌عبی له‌سه‌ر سنووری نێوان عێراق و سووریا و چه‌ند بنكه‌یه‌كی دیكه‌ له‌ناو سووریا، به‌ره‌ی هه‌ماهه‌نگی مقاوه‌مه‌ی عێراقی، هه‌ڕه‌شه‌ی تۆڵه‌‌كردنه‌وه‌ له‌ هێزه‌كانی ئه‌مه‌ریكا ده‌كات.

ئه‌و به‌ره‌یه‌ له‌ راگه‌یه‌ندراوێكدا ده‌ڵێت: "پێشتر گوتوومانه‌ بێده‌نگ نابین له‌سه‌ر مانه‌وه‌ی هێزه‌كانی داگیركاری ئه‌مه‌ریكا، كه‌ پێچه‌وانه‌ی ده‌ستوور و په‌رله‌مان و ئیراده‌ی گه‌لی عێراقه‌".

له‌ به‌شێكی راگه‌یه‌ندراوه‌كه‌دا هاتووه‌: "ئێستا جارێكی دیكه‌ هێزه‌كانی داگیركه‌ر تاوانێكی دیكه‌یان ئه‌نجامدا و ژماره‌یه‌ك جه‌نگاوه‌ری عێراقییان له‌سه‌ر سنووری سووریا كوشت، ئه‌وانه‌ی به‌رگریان له‌ سه‌قامگیری وڵات و گه‌له‌كه‌یان ده‌كرد، ئه‌مڕۆ به‌ ده‌ستی ئه‌مه‌ریكییه‌كان له‌ "قائیم" كوژران".

له‌و راگه‌یه‌ندراوه‌دا، ئه‌و به‌ره‌یه‌ هه‌ڕه‌شه‌ی توند له‌ هێزه‌كانی ئه‌مه‌ریكا ده‌كات و ده‌ڵێت: "ئێمه‌ له‌ به‌ره‌ی مقاوه‌مه‌ی عێراقی تۆڵه‌ی خوێنی شه‌هیدانمان له‌ ئه‌نجامده‌ری ئه‌و تاوانانه‌ ده‌كه‌ینه‌وه‌، به‌ پشتیوانی خوا تاڵیی تۆڵه‌ به‌ دوژمن ده‌چێژین".

لیوای 14 سه‌ر به‌ كه‌تیبه‌كانی میلیشیای سه‌یدولشوهه‌دایه‌ و له‌لایه‌ن ئه‌بو ئالا وه‌لائی سه‌ركردایه‌تی ده‌كرێت، كه‌ ئێران پشتیوانی ده‌كات.