محه‌ممه‌د شیاع سوودانی له پۆستی سه‌رۆك وه‌زیرانی عێراق ده‌ستبه‌كاربوو
K24 – هه‌ولێر:
محه‌ممه‌د شیاع سوودانی به فه‌رمی وه‌ك سه‌رۆك وه‌زیرانی عێراق و فه‌رمانده‌ی باڵای هێزه چه‌كداره‌كانی عێراق ده‌ستبه‌كاربوو.
ئه‌مڕۆ هه‌ینی (28ی تشرینی یه‌كه‌م/ئۆكتۆبه‌ری 2022)، له رێوره‌سمێكدا ده‌ستاوده‌ستكردنی ده‌سه‌ڵات له نێوان مسته‌فا كازمی، سه‌رۆك وه‌زیرانی پێشووی عێراق و محه‌ممه‌د شیاع سوودانی، سه‌رۆك وه‌زیرانی نوێی عێراق ئه‌نجامدرا.
دوای ئه‌وه‌ی دوێنی (27ی تشرینی یه‌كه‌م/ئۆكتۆبه‌ری 2022)، به ئاماده‌بوونی (253) په‌رله‌مانتار، ئه‌نجوومه‌نی نوێنه‌رانی عێراق متمانه‌ی كارنامه و 21 وه‌زیری كابینه‌كه‌ی محه‌ممه‌د شیاع سوودانی به‌خشی.
ئه‌مه‌ش دوای ئه‌وه هات كه رۆژی (13ی تشرینی یه‌كه‌م/ئۆكتۆبه‌ری 2022)، له‌تیف ره‌شید، سه‌رۆك كۆماری عێراق بۆ پێكێهێنانی حكومه‌تی نوێی عێراق، محه‌ممه‌د شیاع سوودانی، وه‌ك كاندیدی لایه‌نه‌كانی چوارچێوه‌ی هه‌ماهه‌نگی راسپێردرا.
هه‌ر ئه‌مڕۆ له تویتێكدا، محه‌ممه‌د شیاع سوودانی ده‌ستبه‌كاربوونی له پۆستی سه‌رۆك وه‌زیران و ده‌ستاوده‌ستكردنی ده‌سه‌ڵاتی له‌گه‌ڵ مسته‌فا كازمی راگه‌یاند.
له‌لایه‌ن خۆشیه‌وه، مسته‌فا كازمی، سه‌رۆك وه‌زیرانی پێشووی عێراق، دوێنێ پێنجشه‌ممه (27ی تشرینی یه‌كه‌م/ئۆكتۆبه‌ری 2022)، له په‌یامێكدا رایگه‌یاند، "بەرپرسیاریه‌تیمان هەڵگرت و ئەرکی نیشتمانی خۆمان بەجێ هێنا، لە ئێستاوە سپاردەکە رادەستی محەمەد شیاع سوودانی دەکەین. هەموو هیوایەکی سەرکەوتن بۆ خۆی و تیمە حکومییەکەشی دەخوازین".
له دانیشتنی ئه‌نجوومه‌نی نوێنه‌رانی عێراقدا بۆ متمانه به‌خشین به كابینه‌كه‌ی، محه‌ممه‌د شیاع سوودانی به‌رنامه‌ی كاری كابینه‌كه‌ی خوێندنه‌وه و جه‌ختی له‌سه‌ر ئه‌نجامدانی چاكسازی و به‌ره‌نگاربوونه‌وه‌ی گه‌نده‌ڵی، پێشكه‌شكردنی خزمه‌تگوزاری، باشتركردنی دۆخی ئابووری و دابینكردنی هه‌لی كار، ئاوه‌دانكردنه‌وه‌ی ناوچه زیانپێكه‌وتووه‌كان و گه‌ڕانه‌وه‌ی ئاواره‌كان بۆ ناوچه‌كانی خۆیان كرده‌وه.
له به‌شێكی دیكه‌ی گوته‌كانیدا، سوودانی به‌ڵێنی به گه‌لی عێراقدا به‌زووترین كات ته‌نگژه و قه‌یرانه‌كان تێبه‌ڕێنن و ده‌سه‌ڵاتی زیاتر به حكومه‌ته ناوخۆییه‌كانی هه‌رێم و پارێزگاكانی عێراق بدات، له‌گه‌ڵ ئه‌وه‌شدا جه‌ختی له‌سه‌ر باشتركردنی په‌یوه‌ندییه‌كانی نێوان هه‌رێمی كوردستان و به‌غدا كرده‌وه بۆ چاره‌سه‌ركردنی كێشه هه‌ڵپه‌سێردراوه‌كانی نێوان هه‌ردوولا.
