په‌رله‌مانی كوردستان ده‌نگ له‌سه‌ر به‌ركاركردنی یاسای واژۆی ئەلیكتڕۆنی و مامەڵە ئەلیكتڕۆنییەكان ده‌دات
K24 – هه‌ولێر:
وابڕیاره له دانیشتنی ئاسایی رۆژی سێشه‌ممه‌ی داهاتوو، په‌رله‌مانی كوردستان ده‌نگ له‌سه‌ر چه‌ند پێشنیاز و پڕۆژەیاسایه‌ك بدات، له‌وانه‌ش پێشنیازه‌یاسای یاسای واژۆی ئەلیكتڕۆنی و مامەڵە ئەلیكتڕۆنییەكان.
ئه‌مڕۆ یه‌كشه‌ممه (27ـی تشرینی دووه‌م/نۆڤێمبه‌ری 2022)، سه‌رۆكایه‌تی په‌رله‌مانی كوردستان، به‌رنامه‌ی كاری دانیشتی رۆژی سێشه‌ممه (29ی تشرینی دووه‌م/نۆڤێمبه‌ری 2022) راگه‌یاند كه ده‌نگ له‌سه‌ر چوار پڕۆژه‌یاسا و پێشنیازه‌یاسا ده‌درێت و خوێندنه‌وه‌ی دووه‌میش بۆ پڕۆژه‌یاسایه‌ك ده‌كرێت.
به گوێره‌ی به‌رنامه‌ی كاری دانیشتنی ژماره (14)ی ئاسایی ئه‌م خوله‌ی په‌رله‌مانی كوردستان، رۆژی سێشممه، ده‌نگ له‌سه‌ر هه‌ردوو پێشنیازه‌یاسای پاراستنی ئاژەڵان لە هەرێمی كوردستان-عێراق و بەركاركردنی یاسای فیدڕاڵیی واژۆی ئەلیكتڕۆنی و مامەڵە ئەلیكتڕۆنییەكان ژمارە 78ـی ساڵی 2012 ده‌درێت.
هه‌روه‌ها له به‌شێكی دیكه‌ی دانیشتنه‌كه ده‌نگ له‌سه‌ر هه‌ردوو پڕۆژه‌یاسای هەمواری پیادەكردنی یاسای بەڕێوەبردنی ئەوقاف، ژمارە 64ـی ساڵی 1966ـی هەمواركراو لە هەرێمی كوردستان-عێراق و هەمواری یەكەمی یاسای ئەنجوومەنی شورای هەرێمی كوردستان-عێراق ژمارە 14ـی ساڵی 2008، ده‌درێت.
له به‌رنامه‌ی كاری دانیشتنه‌كه‌ی رۆژی سێشه‌ممه‌ی په‌رله‌مانی كوردستان، ئاماژه به‌وشه‌كراوه، خوێندنه‌وه‌ی دووه‌م بۆ پڕۆژەیاسای كار لە هەرێمی كوردستان ده‌كرێت.