پارێزگاری بانكی ناوه‌ندی عێراق و یاریده‌ده‌ری وه‌زیری گه‌نجینه‌ی ئه‌مه‌ریكا كۆبوونه‌وه
K24 – هه‌ولێر:
پارێزگاری بانكی ناوه‌ندی عێراق و یاریده‌ده‌ری وه‌زیری گه‌نجینه‌ی ئه‌مه‌ریكا له توركیا كۆبوونه‌وه و به‌گوێره‌ی راگه‌یه‌ندراوی بانكی ناوه‌ندی وه‌زاره‌تی گه‌نجینه‌ی ئه‌مه‌ریكا ئاماده‌یی خۆی نیشانداوه نه‌رمی بنوێنێت.
ئه‌مڕۆ هه‌ینی (3ـی شوبات/فێبرایه‌ری 2023)، عه‌لی موحسین ئیسماعیل، پارێزگاری بانكی ناوه‌نندی عێراق و براین نیلسۆن، یاریده‌ده‌ری وه‌زیری گه‌نجینه‌ی ئه‌مه‌ریكا كۆبوونه‌وه و تاوتوێی دۆخی ئابووری و به‌رزو نزمی به‌های دراویان كرد و هه‌ردوولا جه‌ختیان له‌سه‌ر گرنگی سه‌قامگیری ئابووری عێراق كرده‌وه.
به‌گوێره‌ی رایگه‌یه‌ندراوی بانكی ناوه‌ندی عێراق، لە میانی دیدارەکەدا باس لە هاوکاری و هەماهەنگی نێوان به‌غدا و واشنتن كراوه بۆ گەیشتن بە سەقامگیری نرخی ئاڵوگۆڕی دراو لە عێراق و میکانیزمەکانی پەیوەست بەوەوە.
له‌لایه‌ن خۆیه‌وه، وەزارەتی گەنجینەی ئەمریکا پشتیوانی خۆیی بۆ بەدیهێنانی سەقامگیریی ئابووری لەعیراق دووپاتکردووەتەوە و ئاماژەیداوە، کە ئامادەن نەرمی بنوێنن لە پێناو گەیشتن بە ئامانجە هاوبەشەکان، هەروەها رێککەوتوون لە هەماهەنگی هاوکارییەکانی نێوانیان بەردەوام بن.
هه‌ر به‌پێی راگه‌یه‌ندراوه‌ی بانكی ناوه‌ندی عێراق، له دیداره‌كه‌دا ئاماژه به دوایین په‌یوه‌ندی ته‌له‌فۆنی نێوان محه‌ممه‌د شیاع سوودانی، سه‌رۆك وه‌زیرانی عێراق و جۆ بایدن، سه‌رۆكی ئه‌مه‌ریكا كراوه كه هه‌ردوولا جه‌ختیان له‌سه‌ر به‌دیهێنانی سه‌قامگیری ئابووری له عێراق كرده‌وه، هه‌روه‌ها له هه‌ماهه‌نگییه‌كانی نێوانیان به‌رده‌وامبن تا كۆبوونه‌وه‌ی داهاتوو كه وابڕیاره پێش ناوه‌راستی ئه‌م مانگه له واشنتن به‌ڕێوه‌بچێت.