هه‌ردوو شاندی حکومەتی هەرێمی کوردستان و وه‌زاره‌تی نه‌وتی عێراق كۆبوونه‌وه
K24 – هه‌ولێر:
شاندی حكومه‌تی هه‌رێمی كوردستان كه ئێستا له به‌غدایه له دیدارێكدا له‌گه‌ڵ شاندی وه‌زاره‌تی نه‌وتی عێراقی فیدراڵ، تێڕوانینەکانی حکومەتی هەرێمی کوردستانیان لە بارەی رەشنووسی پرۆژه‌یاسای نەوت و غازی فیدراڵی خستەڕوو.
ئه‌مڕۆ یەکشەممە (12ـی شوبات/فێبرایه‌ری 2023)، شاندی حکومەتی هەرێمی کوردستان لە بەغدا، له كۆبوونه‌وه‌یه‌كدا له‌گه‌ڵ شاندی وەزارەتی نەوتی عێراقی فیدراڵ کۆبووەوە و ئاوات شێخ جەناب، وه‌زیری دارایی و ئابووریی حكومه‌تی هه‌رێمی كوردستان كه سه‌رۆكایه‌تی شانده‌كه ده‌كات ئاماژەی بەوەدا، حکومەتی هەرێمی کوردستان ئامانجیەتی لەگەڵ حکومەتی فیدراڵ بگاتە رێکەوتن بۆ داڕشتنی یاسایەک کە لە چوارچێوەی دەستوور و لە خزمەت هەموو پێکهاتە و هاووڵاتیانی عێراق و هەرێمی کوردستان دا بێت.
به‌گوێره‌ی راگه‌یه‌ندراوی حكومه‌تی هه‌رێمی كوردستان، هەر لە کۆبوونەوەکەدا کەمال محەمەد، وەزیری سامانە سروشتییەکان بەوەکالەت، وردەکاری تێڕوانینەکانی حکومەتی هەرێمی کوردستانی لە بارەی رەشنووسی پرۆژە یاساکەوە خستەڕوو، هه‌روه‌ها ئومێد سەباح، سەرۆکی دیوانی ئەنجومەنی وەزیران، هەبوونی یاسای نەوت و گازی لە عێراق بە گرنگ وەسف کرد و ئاماژەی بە تێروانینی حکومەتی هەرێمی کوردستان لەسەر کۆی پرۆژە یاساکە کرد.
ئێوارەی رۆژی شەممە (11ـی شوبات/فێرایه‌ری 2023)، شاندی حکومەتی هەرێمی کوردستان بەسەرۆکایەتی ئاوات شێخ جەناب، وەزیری دارایی و ئابووری گه‌یشتنه شاری بەغدا.
به‌گوێره‌ی راگه‌یه‌ندراوی حكومه‌ت، ئامانج لە سەردانی شاندی حکومەتی هەرێمی کوردستان بۆ گفتوگۆکردنە لە سەر شایستە داراییەکانی حکومەتی هەرێمی کوردستان لە پڕۆژە یاسای بودجەی ساڵی 2023 عێراق و پڕۆژە یاسای نەوت و غازو مادەی 140 و چەند دۆسیەیەکی دیكه.
وابڕیارە شاندەکەی حکومەتی هەرێمی کوردستان چەندین کۆبوونەوەو دیدار لەگەڵ بەرپرسان و لایەنە پەیوەندیدارەکانی حکومەتی عێراق ئەنجام بدەن بەمەبەستی گەیشتن بە رێکەوتن لەسەر چەند دۆسیەیەکی هەڵپەسێردراو کە لە نێوان حکومەتی هەرێم و حکومەتی عێراق بەچارەسەرنەکراوی ماوەتەوە.
پێشتر كوردستان24 بڵاویكرده‌وه، ئێواره‌ی ئه‌مڕۆ شه‌ممه (11ـی شوبات/فێبرایه‌ری 2023)، شاندی حكومه‌تی هه‌رێمی كوردستان به سه‌رۆكایه‌تی ئاوات شێخ جه‌ناب، وه‌زیری دارایی و ئابووری و ئه‌ندامێتی هه‌ریه‌كه له كه‌مال محه‌ممه‌د، وه‌زیری كاره‌با و سامانه‌سرووشتییه‌كان به‌وه‌كاله‌ت، ئومێد سه‌باح، سه‌رۆكی دیوانی ئه‌نجوومه‌نی وه‌زیران، خالد هادی چاوشلی سه‌رۆكی دیوانی چاودێری دارایی و جوتیار عادل، گوته‌بێژی حكومه‌ت و فارس عیسا، سه‌رۆكی نوێنه‌رایه‌تی حكومه‌تی هه‌رێم له به‌غدا، پێكهاتووه.