نێچیرڤان بارزانی و لۆید ئۆستن هاوڕان كه‌ تيرۆر و داعش هێشتا مه‌ترسين

نێچیرڤان بارزانی و لۆید ئۆستن
نێچیرڤان بارزانی و لۆید ئۆستن

K24 - هەولێر:

نێچيرڤان بارزانى سه‌رۆكى ‏هه‌رێمى كوردستان و لۆيد ئۆستن وه‌زيرى به‌رگريى ئه‌مه‌ريكا، تاووتوێی دۆخى ئه‌منى و دوايين پێشهاته‌كانى شه‌ڕى دژ به‌ تيرۆر، كێشه‌كانى ‏هه‌ولێر ـ به‌غدا، دۆخى ناوخۆى هه‌رێمى كوردستانیان كرد.

ماڵپه‌ڕی سه‌رۆكایه‌تی هه‌رێمی كوردستان ئه‌مڕۆ (سێشه‌ممه‌ 7ـی ئادار / مارسی 2023)، راگه‌یه‌ندراوێكی بڵاوكرده‌وه‌، تێیدا هاتووه‌، نێچيرڤان بارزانى سه‌رۆكى ‏هه‌رێمى كوردستان، پێشوازى له‌ لۆيد ئۆستن وه‌زيرى به‌رگريى ئه‌مه‌ريكا و ‏شاندێكى ياوه‌رى كرد.

له‌ كۆبوونه‌وه‌يه‌كدا كه‌ جێگرانى سه‌رۆكی هه‌رێم و به‌رپرسانى باڵاى وه‌زاره‌تى ‏پێشمه‌رگه‌ ئاماده‌ىبوون، په‌يوه‌ندييه‌كانى ئه‌مه‌ريكا له‌گه‌ڵ عێراق و هه‌رێمى ‏كوردستان، دۆخى ئه‌منى و دوايين پێشهاته‌كانى شه‌ڕى دژى تيرۆر، كێشه‌كانى ‏هه‌ولێر ـ به‌غدا، دۆخى ناوخۆى هه‌رێمى كوردستان و هه‌ماهه‌نگيى پێشمه‌رگه‌ و ‏سوپاى عێراق بۆ به‌ره‌نگاربوونه‌وه‌ى داعش، تاووتوێكران.‏

وه‌زيرى به‌رگريى ئه‌مه‌ریكا‎ وێڕاى ستايش و پێزانين بۆ ڕۆڵى پێشمه‌رگه‌ له‌ ‏تێكشاندنى داعشدا، پشتگيريى وڵاته‌كه‌ى بۆ عێراق و هه‌رێمى كوردستان دووپات‏كرده‌وه.

لۆید ئۆستن‌ و ئاماژه‌ى به‌وه‌ دا، به‌ بايه‌خه‌وه‌ له‌ پرۆسه‌ى چاكسازى و ڕێكخستنه‌وه‌ى ‏پێشمه‌رگه‌ ده‌ڕوانن و هه‌موو هاوكارييه‌كى پێويست بۆ سه‌رخستنى پرۆسه‌كه‌ ‏پێشكه‌ش ده‌كه‌ن، له‌ چوارچێوه‌ى ياداشتى لێكگه‌يشتنى پێنتاگۆن له‌گه‌ڵ وه‌زاره‌تى ‏پێشمه‌رگه‌.‏

سه‌رۆكایه‌تی هه‌رێمی كوردستان له‌ میانه‌ی راگه‌یه‌ندراوه‌كه‌یدا ئاماژه‌ی به‌وه‌ش كردووه‌، هه‌ردوو لا هاوڕا بوون كه‌ تيرۆر و داعش هێشتا مه‌ترسين و هه‌ڕه‌شه‌ى ڕاسته‌قينه‌ن ‏له‌ عێراق و سووريا و بۆ به‌ره‌نگاربوونه‌وه‌يان و نه‌هێشتنى يه‌كجاره‌كييان، عێراق و ‏هه‌رێمى كوردستان، هێشتا پێويستييان به‌ پشتگيريى ئه‌مه‌ريكا و هاوپه‌يمانيى ‏نێوده‌وڵه‌تييه‌.

هه‌روه‌ها هاوڕا بوون له‌سه‌ر گرنگيى كارى پێكه‌وه‌يى و هاوبه‌ش له‌ ‏ناوچه‌كه‌ بۆ پاراستنى ئارامى و سه‌قامگيرى.‏

نێچيرڤان بارزانى، سوپاس و پێزانينى هه‌رێمى كوردستانى بۆ هه‌موو ‏هاوكارى و پشتگيرييه‌كانى ئه‌مه‌ريكا بۆ هه‌رێمى كوردستان و ڕۆڵى تيمه‌ ‏سه‌ربازييه‌كانى ئه‌مه‌ريكا له‌ پرۆسه‌ى ڕێكخستنه‌وه‌ى پێشمه‌رگه‌ ده‌ربڕى، هه‌روه‌ها ‏دووپاتیكرده‌وه‌، وێڕاى ته‌گه‌ره‌كانيش، پڕۆسه‌ى چاكسازى و ڕێكخستنه‌ى ‏پێشمه‌رگه‌ سه‌رده‌خه‌ن.‏

وه‌زيرى به‌رگريى ئه‌مه‌ريكا پشتگيريى وڵاته‌كه‌ى بۆ گفتوگۆى چاره‌سه‌ركردنى ‏كێشه‌كانى هه‌ولێر ـ به‌غدا نيشان دا و لايه‌نه‌ سياسييه‌كانى هه‌رێمى كوردستانى ‏هان دا بۆ يه‌كڕيزى و چاره‌سه‌ركردنى كێشه‌كانيان.‏

په‌یوه‌ندييه‌كانى عێراق و هه‌رێمى كوردستان له‌گه‌ڵ وڵاتانى دراوسێ، تاوتوێكردنى ‏دوايين پێشهاته‌كانى ناوچه‌كه‌ به‌گشتى و چه‌ند پرسێكى جێى بايه‌خى هاوبه‌ش، ‏ته‌وه‌رێكى ديكه‌ى كۆبوونه‌وه‌كه‌ بوو.‏