دەستپێشخەرییەکەی سەرۆک بارزانی زەمینەسازی بۆ کۆبوونەوەی نێوان لایەنە سیاسییەکان دەڕەخسێنێت

سەرۆک بارزانی
سەرۆک بارزانی

K24 - سلێمانی:

ئەندامێکی سەرکردایەتی یەکێتی، دەستپێشخەرییەکەی سەرۆک بارزانی بە گرنگ وەسف کرد و هیواشیخواست کۆبوونەوەکانی نێوان لایەنە سیاسییەکان لە پیناو چارەسەکردنی ناکۆکیەکانیان بەردەوامبێت.

ئەمڕۆ یەکشەممە (14ــی ئایاری 2023)، مستەفا چاوڕەش، ئەندامی سەرکردایەتی یەکێتی نیشتیمانی کوردستان، بە کوردستان24ــی راگەیاند، دەستپێشخەرییەکەی سەرۆک بارزانی هەنگاوێکی باشە و لە بەرژەوەندی گه‌لی كورده‌.

هیواشیخواست کۆبوونەوەکان درێژەی هەبێت تاکو دەگەن بە چارەسەر لەپێناو بەرژەوەندی هاووڵاتییانی هەرێمی کوردستان.

لەلایەکی دیکەوە، هەڤاڵ ئەبوبەکر پارێزگاری سلێمانی، ئەو دەستپێشخەرییەی سەرۆک بارزانی کە بۆ ئاشتەوایی و کۆبوونەوەی نیوان لایەنە سیاسییەکان ئه‌نجامیدا، بە خێرایی جێبەجێبکرێت و لایەنە سیاسییەکان بێنە سەرهێڵ.

لەلایەن خۆیەوە، سەعید سەلیم، بەرپرسی لقی چواری پارتی، بۆ کوردستان24 گوتی: "دوای پەیامەکەی سەرۆک مەسعود بارزانی، مەکتەبی سیاسی پارتی کۆبوونەوەی خۆی ئەنجامدا و تێیدا پابەندییان بۆ پەیامەکەی سەرۆک بارزانی نیشاندا.

رۆژی پێنجشەممە (11ـی ئایاری 2023)، سەرۆک بارزانی لەمیانی گوتارێکدا لە رێورەسمی کردنەوەی یادگەی نیشتمانیی بارزانی پەیامێکی ئاراستەی لایەنە سیاسییەکانی هەرێمی کوردستان کرد و داوای لێکردن لاپەڕەیەکی نوێ هەڵبدەنەوە و گوتی، بە دژایەتیکردنی یەکتری کەس هیچی دەستناکەوێت.

سەرۆک بارزانی لە پەیامەکەیدا، داوای لە هەردوو مەکتەبی سیاسیی پارتی و یەکێتی کرد کۆببنەو بۆ کۆتایی هێنان بە کێشەکان و ئامادەکاری بکەن بۆ کۆبوونەوەی فراوانی لایەنەکان پێش 18ـی مانگ لەپێناو گەیشتن بە رێککەوتن و لێکتێگەیشتنی هاوبەش.

دوای پەیامەکەی سەرۆک بارزانیش، هەریەکە لە سەرۆکوەزیران مەسرور بارزانی و مەکتەبی سیاسیی پارتی دیموکراتی کوردستان و زۆربەی سەرکردە و لایەنە سیاسییەکانی کوردستان پشتیوانی و ئامادەیی خۆیان بۆ جێبەجێکردنی ناوەڕۆکی پەیامەکەی سەرۆک بارزانی دەربڕی.

رۆژی (26ـی ئاداری 2023)، دڵشاد شەهاب، گوتەبێژی سەرۆکایەتی هەرێمی کوردستان لە کۆنفرانسێکی رۆژنامەوانیدا رایگەیاند: "سەرۆکی هەرێمی کوردستان بەپێی یاسای ژمارە 1ی ساڵی 2005ی هەموارکراو کە یاسای سەرۆکایەتی هەرێمی کوردستانە بە فەرمانێک رۆژی (18ـی تشرینی دووەمی 2023) بۆ ئەنجامدانی هەڵبژاردنی پەرلەمانی کوردستان دیاریکردووە".

بۆ کاراکردنەوەی کۆمیسیۆنیش، پەرلەمانی کوردستان، رۆژی 5ـی نیسانی 2023 تا رۆژی 12ـی نیسانی 2023، دەرگای خۆکاندیکردن بۆ ئەنجوومەنی کۆمیسیاران کردەوە و رۆژی (10ـی نیسانی 2023)، هاوار محەممەد، گوتەبێژی بەشی هەڵبژاردنەکانی پارتی بە کوردستان24ـی راگەیاند، دوو پۆست لە ئەنجوومەنی کۆمیسیارانی کۆمیسیۆنی باڵای هەڵبژاردن و راپرسیی هەرێمی کوردستان بە بەتاڵی ماونەتەوە و پارتی لە پشکی خۆی بەهجەت ئاڤدەل لە جێگەی جوتیار عادل بۆ ئەنجوومەنەکە کاندید کردووە.

پێشتر رێواز فایەق، سەرۆکی پەرلەمانی کوردستان رایگەیاندووە، بەپێی رێککەوتنی لایەنەکان رۆژی دەنگدان بۆ کاراکردنەوەی کۆمیسیۆن و هەمواری یاسای هەڵبژاردن لە یەک کات دەبێت.

هەروەها رۆژی (30ـی نیسانی 2023)، فراکسیۆنی پارتی دیموکراتی کوردستان لە یاداشتێکدا بۆ سەرۆکایەتی پەرلەمانی کوردستان داوایکرد، لە چەند رۆژی ئایندەدا متمانەدان بە ئەنجومەنی کۆمسیارانی کۆمیسیۆنی باڵای سەربەخۆی هەڵبژاردنەکان و راپرسی هەرێمی کوردستان بخرێتە بەرنامەی دانیشتنی پەرلەمان و بەر لە (18ـی ئایاری 2023) کە دەکاتە شەش مانگ بەر لە وادەی دیاریکراوی هەڵبژاردنی پەرلەمانی کوردستان، کۆمیسیۆنێکی کارا هەبێت و هیچ بیانوو بۆ دواخستنی هەڵبژاردن نەمێنێت.