ڤیان سه‌بری: بابه‌تی بودجه‌ بابه‌تێكی هه‌ستیاره‌، ده‌بێت ته‌واوی ئه‌ندامانی په‌رله‌مان له‌سه‌ری كۆكبن

K24 - هەولێر:

له‌باره‌ی گۆڕانكارییه‌كانی نێو لیژنه‌ی دارایی‌ په‌رله‌مانی عێراق، سه‌رۆكی فراكسیۆنی پارتی رایده‌گه‌یه‌نێت، بابه‌تی بودجه‌ی گشتی عێراق، بابه‌تێكی هه‌ستیاره‌، ده‌بێت ته‌واوی ئه‌ندامانی په‌رله‌مان له‌سه‌ری كۆكبن.

ڤیان سه‌بری سه‌رۆكی فراكسیۆنی پارتی دیموكراتی كوردستان، له‌ په‌رله‌مانی عێراق به‌ كوردستان24ـی راگه‌یاند، ئه‌و ده‌ستكاریكردنه‌ی لیژنه‌ی دارایی په‌رله‌مانی عێراق،  تایبه‌ت به‌ مادده‌كانی 13 و 14ـی تایبه‌ته‌ به‌ هه‌رێمی كوردستان، ناده‌ستوورییه‌.

هه‌روه‌ها ڤیان سه‌بری راشیگه‌یاند، رێككه‌وتنێك هه‌بوو، كه‌ رۆژی شه‌ممه‌ ده‌نگدان بۆ بودجه‌ی گشتی عێراق بكرێت، به‌ڵام تا ئه‌و ماددانه‌ نه‌گه‌ڕێنه‌وه‌ سه‌ر دۆخی جارانی، ده‌نگدان ئه‌نجام نادرێت.

سه‌رۆكی فراكسیۆنی پارتی ده‌شڵێت: "ده‌بێت مادده‌كانی 13 و 14 بگه‌ڕێته‌وه‌ دۆخی جارانی، رێككه‌وتنی هاوپه‌یمانی ده‌وڵه‌ت هه‌یه‌ و رێكه‌وتن له‌گه‌ڵ پێكهاته‌ی سووننه‌ و شیعه‌ كراوه‌، له‌وێ داواكراوه‌ هه‌رچی رێكه‌وتنێك تایبه‌ت به‌ هه‌رێمی كوردستان هه‌بێت، ده‌بێت بگه‌ڕێته‌وه‌‌ بۆ هه‌رێم".

دوای پەسەندکردنی هەردوو ماددەی 13 و 14ــی پرۆژەیاسای بودجە لە لیژنەی دارایی پەرلەمانی عێراق کە تایبەتە بە داهاتی نەوت و شایستە داراییەکانی هەرێمی کوردستان، کاردانەوەی لێکەوتەوە و لەلایەن حکومەتی هەرێمی کوردستانیشەوە رەتکرایەوە، بەهۆی ئەوەی پێچەوانەی ناوەڕۆکی کارنامەی کابینەکەی سوودانی و رێککەوتنی واژووکراوی نێوان هەردوو حکومەتی هەرێمی کوردستان و فیدراڵییە.

دوای چەند هەفتەیەک لە گفتوگۆکردن لەسەر پرۆژەیاسای بودجە لەلایەن لیژنەی دارایی پەرلەمانی عێراقەوە، پێش چەند رۆژێک لەکۆتایی هاتنی گفتوگۆکان و ئامادەکاری بۆ دەنگدان لەسەر کۆی پرۆژەکە لەلایەن پەرلەمانەوە، چەند پەرلەمانتارێکی لیژنەکە پێشنیازی گۆرانکاری لەو دوو ماددەیەدا پێشکەش دەکەن کە تایبەتە بە هەرێمی کوردستان و بەو هۆیەشەوە، دانیشتنی پەرلەمانی عێراق کە وابڕیاربوو رۆژی شەممە (27ـی ئایاری 2023) ئەنجام بدرێت، بۆ کاتێکی نادیار دواخرا.