ئەحمەد یەنەر: ئەردۆغان دووبارە بە سەرۆککۆماری تورکیا هەڵبژێردرایەوە

K24 – هەولێر:

سەرۆکی کۆمسیۆنی باڵای هەلبژاردنەکانی تورکیا، رایگەیاند، لە گەڕی دووەمی هەڵبژاردنی سەرۆکایەتی تورکیا، ئەردۆغان توانی زیاتر لە 27 ملیۆن دەنگ بەدەستبهێنێت و ببێتەوە بە سەرۆک کۆماری تورکیا.

ئەمڕۆ یەكشەممە (28ــی ئایاری 2023)، ئەحمەد یەنەر، سەرۆکی کۆمسیۆنی باڵای هەڵبژاردنەکانی تورکیا، رایگەیاند، لەناوخۆی وڵاتدا زیاتر لە 190 هەزار سندوق کراوەتەوە. لە دەرەوەی وڵاتیش بەڕێژەی %99.2 سندوقەکان کراونەتەوە.هەروەها لە ناوخۆی وڵات ئەردۆغان %51 دەنگەکانی بەدەستهێنا، لە بەرامبەردا کەمال کڵچدار ئۆغڵۆ  %47 دەنگەکانی بەدەستهێناوە.

هەروەها راشیگەیاند، ئەردۆغان لە دەرەوەی وڵات %59.8  دەنگەکانیان بەدەستهێناوە و کڵچدار ئۆغڵۆش زیاتر  %40 دەنگەکانی بەدەستهێناوە، کۆی گشتی ئەردۆغان %52.14 دەنگەکانی بەدەستهێناوە، لە بەرامبەردا کڵچدار ئۆغڵۆ %47.86  دەنگەکانی بەدەستهێناوە.

ئەحمەد یەنەر، ئاماژەی بەوەشکرد، ئەردۆغان توانی  زیاتر لە 27 ملیۆن دەنگ بەدەستنهێنێت، لە بەرامبەردا کڵچدار ئۆغڵۆ زیاتر لە 25 ملیۆن دەنگی بەدەستهێناوە، جیاوازی دەنگەکانی نێوان هەردوو کاندیدەکە دوو ملیۆن و 254 هەزار دەنگە.

سەرۆکی کۆمسیۆنی باڵای هەلبژاردنەکانی تورکیا، باسی لەوەشکرد، زیاتر لە 800 هەزار دەنگ هێشتا لە سیستم هەژمار نەکراوە، ئەگەر ئەو دەنگانە بۆ هەر کاندیدێک هەژماربکرێت ئەنجامەکە ناگۆڕدرێت، بەڵکو رەجەب تەیب ئەردۆغان بە دووبارە سەرۆک کۆماری تورکیا هەڵبژێردرایەوە.

ئەمڕۆ یەکشەممە (28ـی ئایاری 2023)، گەڕی دووەمی هەڵبژاردنی سەرۆکایەتی تورکیا بەڕێوەچوو، میدیا تورکییەکان بڵاویانکردەوە کە رێژەی بەشداریکردن گەیشتە 84%.

بەگوێرەی ئامارەکانی کۆمیسیۆنی باڵای هەڵبژاردنەکانی تورکیا لە گەڕی دووەمی هەڵبژاردنی سەرۆکایەتی تورکیا، رەجەب تەیب ئەردۆغان، کاندیدی هاوپەیمانی کۆمار رێژەی 52.2%ـی دەنگەکانی بەدەستهێناوە، لە بەرامبەردا کەمال کڵچدارئۆغڵو، کاندیدی هاوپەیمانی میللـەت رێژەی 47.8%ـی دەنگەکانی بەدەستهێناوە.

لەبارەی ژمارەی دەنگەکانیش، لە گەڕی دووەمدا، ئەردۆغان تا رێژەی جیاکردنەوەی 99.9%ـی دەنگەکان، 27 ملیۆن و 725 هەزار و 131 دەنگی بەدەستهێناوە، هەروەها کڵچدارئۆغڵو، 25 ملیۆن و 432 هەزار و 951 دەنگی بەدەستهێناوە.

بەگوێرەی دەستووری نوێی ئەو وڵاتە، سیستەمی تورکیا سەرۆکایەتییە و سەرۆکی هەڵبژێدراو بۆ ماوەی پێنج ساڵی داهاتوو سەرۆکایەتی تورکیا دەکات.

دوای ئەوەی لە گەڕی یەکەمی هەڵبژاردن کە لە (14ـی ئایاری 2023)، بەڕێوەچوو، هیچ یەکێک کە کاندیدەکانی سەرۆکایەتی نەیانتوانی دەنگی نیوەی زیاتری دەنگدەرانی وڵاتەکەیان بەدەستبهێنن، بۆیە بۆ یەکلاییکردنەوەی هەڵبژاردنی سەرۆکی تورکیا بۆ پێنج ساڵی داهاتوو، کەوتە گەڕی دووەم کە ئەمەش بووە یەکەم هەڵبژاردن لە مێژووی دروستبوونی کۆماری تورکیا بۆ یەکلاییکردنەوەی هەڵبژاردنی سەرۆکی وڵات، پەنا بۆ گەڕی دووەمی هەڵبژاردن ببرێت.

بەگوێرەی دەرئەنجامەکانی کۆمیسیۆن لە گەڕی یەکەمی هەڵبژاردن، رەجەب تەیب ئەردۆغان لە هاوپەیمانی کۆمار، 49.52%ـی دەنگەکانی بەدەستهێناوە و رکابەرە سەرەکییەکەی کەمال کڵچدارئۆغڵو، لە هاوەپەیمانی میللـەت 44.88%ـی دەنگەکانی بەدەستهێنا و سینان ئۆغانیش لە هاوپەیمانی ئاتا، 5.17%ـی دەنگەکانی بەدەستهێنا.

بەپێی رێژەی دەنگەکانی هەڵبژاردنیش لە گەڕی یەکەم کە رێژەی بەشداریکردن گەیشتە 86.98%، رەجەب تەیب ئەردۆ‌غان، 27 ملیۆن و 133 هەزار 837 دەنگی بەدەستهێنا، کەمال کڵچدارئۆغڵوش 24 ملیۆن و 594 هەزار و 932 دەنگی بەدەستهێنا، دەنگەکانی سینان ئۆغانیش بریتی بوو لە دوو ملیۆن 831 هەزار و 208 دەنگ.