رۆژانە لە رێگەی 350 بارهەڵگر بەرهەمی کوردستان هەناردەی پارێزگاکانی ناوەڕاست و خوارووی عێراق دەکرێت

K24 - هەولێر

لە وەرزی هاویندا بەروبوومی جووتیاران پێدەگات و بازاڕەکان پڕ دەکەنەوە، بەڵام ئەو نرخە ناکات کە بە دڵی ئەوان بێت و نرخی بەرهەمەکانیان دادەبەزێت. جووتیارێک دەڵێت: دەمانەوێت سنوورەکان دابخرێت و ئەو بەرووبوومەی ئێمە دەیفرۆشین هاوردەی هەرێمی کوردستان نەکرێت. وەزارەتی کشتوکاڵێش رایدەگەیەنێت: جگە لە باج خستنە سەر بەرهەمی هاوردە، رێگەپێدانیشمان بۆ جووتیاران کردووە بەروبومەکانیان بنێرنە ناوەڕاست و خوارووی عێراق.

لە گومرگی سەوزەو میوەی هەولێر، بەراورد بە مانگەکانی رابردوو نرخی بەرووبوومە خۆماڵییەکان نزیکەی سەدا 40 دابەزیووە.

جووتیارێک بەناوی هۆگر سەڵاح، دەڵێ: "ئەگەر حکومەتی عێراق رێگری لە بەرهەمەکانمان نەکات بۆ ناوەڕاست و خوارووی عێراق، گرفت بۆ ساغکردنەوەی بەروبوومەکان دروست نابێت و جووتیاری هەرێمی کوردستان سوودمەند دەبێت و بۆ ساڵانی داهاتوو بەرهەمی زیاد دەکات".

هەمزە عەزیز، جووتیارێکی دیکەی سنووری هەولێرە و داوا لە وەزارەتی کشتوکاڵ دەکات، سنوورەکان دابخرێن و ئەو بەروبوومەی لەناوخۆ هەیە رێگەی نەدرێت لە وڵاتانی دراوسێ هاوردە بکرێت.

ئەو بەر بوومانەی لەم وەزەدا جووتیاران بەرهەمیان هێناوە بریتین لە پەتاتە، تەماتە، خەیار، کاڵەک و پیاز، لەگەڵ چەند بەرهەمێکی دیکە، بە مەبەستی فرۆشتن و ساغبوونەوەی بەرهەمەکەشیان حکومەت پاڵپشتی جووتیارانی کردووە، بەوەی دەتوانن بەرهەمەکانیان بنێرنە دەرەوەی کوردستان.

هوشیار جەلیل بەرپرسی چاودێری گومرگی کشتوکاڵ، بە کوردستان24ی راگەیاند: "خۆشبەختانە ماوەیەک لەمەوبەر شاندێکی وەزارەتی کشتوکاڵ سەردانی بەغدای کرد و بە چاودێری و سەرپەرشتی سەرۆکی حکومەتی هەرێمی کوردستان رێککەوتنێک کرا بۆ هەناردەکردنی بەروبووم بۆ پارێزگاکانی ناوەڕاست و خوارووی عێراق، ئێستا رۆژانە لە رێگەی 350 بارهەڵگر بەرهەمی خۆماڵی هەناردە بۆ پارێزگاکانی دیکەی عێراق هاوردە دەکەین".

حکومەتی هەرێمی کوردستان، لە کاتی پێگەیشتنی بەروبوومی ناوخۆدا بۆ پشتگیری کردنی جووتیاران، ئەو بەرهەمانەی هاوردە دەکرێت باجیان دەخاتە سەر بە مەبەستی ساغبوونەوەی بەرهەمی ناوخۆ بەشێک لە بەرهەمە هاوردەکراوەکانیش قەدەغە دەکرێت.